Air Astana kompanıasy bortseriginiń qazaq tilin bilmegenine narazalyǵyn bildirip, qazaq tilinde qyzmet kórsetýin talap etken Oǵyz Doǵan atalmysh kompanıadan óz kinásin moıyndap keshirim suraýyn jáne moraldyq shyǵyn retinde 1 teńge berýin talap etip otyr dep habarlaıdy Qamshy.kz aqparat agenttigi Today.kz-ke silteme jasap. Azamattyq talap Almatynyń Túrksib aýdandyq sotyna kelip tústi.

 Oǵyz Doǵannyń advokaty Abzal Quspan talap týrasynda aıtyp berdi.

«Biz Air Astana kompanıasynyń óz kinásin moıyndaýyn, Oǵyz Doǵannan keshirim suraýyn talap etemiz. Biraq prosesýaldyq kodeks boıynsha talapty ózgerte alamyz. Ázirshe tek keshirim suraýyn ǵana talap etip otyrmyz. Moraldyq shyǵyn retinde 1 teńge kóleminde aqsha talap etý máselesi qarastyrylýda» dedi Abzal Quspan.

Aıta keteıik, Air Astana ókilderi sotqa kelmedi. Buǵan deıin Oǵyz Doǵannyń azamattyq talaby basqa sottyń qaraýynda boldy.

«Bul is sýdıa Amantaıulynyń qaraýynda boldy. Ol isti qabyldady, alaıda 4-shi qazanda advokatpen jeke tanys ekenin, ol onyń kýrstasy ekenin aıtyp isten bas tartty. 5-shi qazanda is maǵan tapsyryldy. Buǵan deıin oǵan daıyndyq júrgizilmedi. Birde-bir sot otyrysy bolmady. Eki jaqty tatýlastyrý úshin 16-shy qazanda sot otyrysy ótedi. Múmkin másele beıbit túrde sheshiletin shyǵar. Sonymen qatar, barlyq ótinishterdi qaraý kerek» dedi sýdıa Nurjan Qalymjanova.

Esterińizge sala keteıik, áleýmettik jelide Air Astana kompanıasy ushaǵynyń jolaýshysy Oǵyz Doǵan bortseriktiń memlekettik tildi bilmeıtinin jáne qazaq tilinde qyzmet kórsetpedi dep aıyptaǵan vıdeosy taraldy. Oqıǵa 14-shi tamyzda boldy.