Quqyq qorǵaý organdarynyń qyzmetkerlerine sıfrlandyrýǵa kóshýge baılanysty jumysta smartfon paıdalanýǵa ruqsat berilýi múmkin.

Bul týraly Qamshy.kz aqparat agenttigi Sputnik Qazaqstan málimetine súıenip jazady.

Májiliste búgin keıbir zańnamalyq aktilerge quqyqtyq qorǵaý qyzmetiniń prosestik negizderin jańǵyrtý máseleleri boıynsha ózgerister engizý týraly zań jobasy tanystyryldy. Otyrys barysynda ishki ister mınıstriniń orynbasary Rashıd Jaqypov elimizde qazir pılottyq rejımde qylmystyq isterdi elekrondy túrde júrgizý qolǵa alynǵanyn atap ótti.

“Sıfrlandyrý – bul bolashaq, biraq qylmystyq qýdalaý men qylmystyq jaýapkershilikke tartýdyń ereksheligin eskerý kerek. Elektrondy tergeý sekildi formaǵa tolyqqandy kóshý úshin ishki ister organdarynyń tehnıkalyq jaraqtandyrylýy kóńil kónshitpeıtinin biz kórip otyrmyz”, — dedi Jaqypov.

Vıse-mınıstr proseske qatysatyn búkil qurylymdardy tolyqqandy tehnıkalyq jabdyqtaý úshin 11 mıllıard teńge qajet ekenin aıtty.

Zań jobasynyń tanystyrylymynan keıin jýrnalıser Bas prokýrordyń orynbasary Marat Ahmetjanovtan sıfrlandyrýǵa baılanysty smartfon paıdalanýǵa ruqsat berý jaǵy qalaı bolatynyn surady.

“Iá, árıne. Bul suraq barlyq máselemen birge qarastyrylatyn shyǵar”, — dedi Ahmetjanov.

Ótken jyly kóktemde Qazaqstanda memlekettik organdardyń qyzmetkerleri men ǵımaratqa kiretin azamattarǵa mobıldik qurylǵylar (smartfon, planshet, smart-saǵat) paıdalanýǵa tyıym salynǵan bolatyn. Bul shara qyzmettik aqparattyń áleýmettik jeli arqyly tarap ketý faktileriniń jıilep ketýine baılanysty qolǵa alyndy.