Shymkenttiń sheneýnikteri qoǵamdyq kólikpen qatynap júr. Qala ákimi Ǵabıdolla Ábdirahymovtyń ózi bastap qaramaǵyndaǵy jetekshi qyzmetkerlerge 1 aı qyzmettik kólikke minýge tyıym saldy dep habarlaıdy Qamshy.kz aqparat agenttigi otyrar.kz-kesilteme jasaı otyryp. Endi ákim jáne onyń orynbasarlary, bólim basshylary búginnen bastap jumystaryna avtobýspen qatynaı bastady. Jaýapty mamandar qur baryp-kelmeı, jolaýshylar kóligi salasyndaǵy kem-ketikter men ereje buzýshylyqtardy anyqtaýy tıis.

Shymkenttegi qoǵamdyq kóliktiń jumysy tap-tuınaqtaı. Ár aıaldamaǵa aıaldaý ýaqyty da saqtalǵan. Onyń bir sebebi, jolaýshylar kóligimen sheneýnikter júr. Qalanyń qaq ortasyndaǵy «Spartak» aıaldamasynan eń birinshi bolyp Ál Farabı aýdanynyń ákimi Baýyrjan Qaljanov tústi. Bir emes, birden eki baǵyttyq kólikpen jumysqa jetken sheneýnik qysylmaı, der kezinde kelgenin aıtty.

Baýyrjan Qaljanov, Ál Farabı aýdanynyń ákimi: «Men №69 baǵyttaǵy avtobýsqa mindim. Tez jettim. İshi taza, qyzmet kórsetý deńgeıi joǵary. Bılet te berdi.»

Qýatjan Jumataev, qalalyq jolaýshylar kóligi jáne avtomobıl joldary bóliminiń basshysy: «Men bir emes, eki avtobýsqa mindim. Árıne, jolaýshy kóp. Bul tańǵy «chas-pıkke» baılanysty. Úsh aıaldamada jolaýshylar kóp mindi. Men Bekjan bazary mańynan №12 baǵyttaǵy kólikke otyrdym. Osy jerge deıin 29 mınýtta jetti. Endi «chas-pıkte» joaýshylar aǵyny kóp bolatynyn jasyrmaımyz. Ol barlyq iri qalanyń máselesi. Mine, jolaýshy bıletin aldym. Men bul bastamany qoldaımyn».

Osylaısha qala ákiminiń tapsyrmasy birden oryndaldy jáne bir aıǵa jalǵasady. Baıqaǵanymyz — ákimdiktiń ǵımaratyna bir de bir qyzmettik kólik kelip toqtamady. Ákimdiktegilerdiń aıtýynsha, qyzmettik kólik júrgizýshileri aqyly eńbek demalasyna ketken. Iaǵnı eńbek kodeksi boıynsha aılyǵynyń 50 paıyzy tólenedi. Al qyzmettik kólikterdiń esigine mór basylyp, turaqqa qoıylǵan.