Qyrǵyzstan prezıdenti Almazbek Atambaev stýdentterge prezıdenttik stıpendıa tabystar kezde, qazaq-qyrǵyz shekarasyndaǵy máselege Nazarbaevtyń janyndaǵy sheneýnikter kináli ekendigin aıtty, — dep habarlaıdy Qamshy.kz aqparat agenttigi Sputnik Kyrgyzstan saıtyna silteme jasaı otyryp.

Eske sala ketetin bolsaq, Almazbek Atambaev osydan biraz ýaqyt buryn Qazaqstandaǵy bılikti synǵa alǵan bolatyn. Osy jaǵdaıdan keıin 10-shy qazannan bastap Qazaqstan qazaq-qyrǵyz shekarasyndaǵy baqylaýdy kúsheıtti.

«Qazaqstannan basqa da kórshi elder bizge qysym kórsetkisi keldi. Islam Kárimovtyń kezinde Qyrǵyzstannyń keı aımaǵynda jarty jylǵa jýyq gaz ben jaryq bolmady. Biraq Ózbekstanmen qazirgi ara-qatynasymyz Qazaqstanmen qarym-qatynasqa qaraǵanda áldeqaıda jaqsy. Biz Qytaı, Tájikstan elderimen de jaqsy qarym-qatynastamyz», — dedi Atambaev.

Onyń sózine súıensek, Qazaqstan  shekaradaǵy másele arqyly Qyrǵyzstandy Reseıden alystatýdy maqsat etip otyr.

«Meniń oıymsha, Nazarbaev bul týraly tipti bilmeıdi de. Sebebi ol barlyq prezıdentter sekildi qasyndaǵy óz qarabastaryn oılaıtyn  sheneýnikter men basshylarǵa senedi. Sonymen birge olardyń batys elinde bank shottary bar. Olar Nazarbaevtan keıingi jaǵdaıdy, óz baılyqtaryn qalaı saqtap qalý kerektigin oılap otyr», — dep málimdedi Atambaev.

«Múmkin men Nazarbaev týraly qyzýqandylyqpen qate pikir aıtqan shyǵarmyn. Bul týraly uzaq oılandym.  Nazarbaev ta men sekildi ańqaý adam, onyń máseleleri kóp bolýy da ábden múmkin. Ol qasyndaǵy sheneýnikterge senip otyr», — dedi Almazbek Atambaev.

Onyń pikirinshe, olıgarhtardyń basty maqsaty – AQSH eline jaǵyný. Sonymen birge Qyrǵyzstan prezıdenti Qazaqstannyń latyn álipbıine kóshýi de tegin emes dep sanaıdy.