15 qazanda Almaty oblysy İle aýdanynyń Muhametjan Túımebaı aýylynda Halyq Qaharmany, QR tuńǵysh qorǵanys mınıstri, armıa generaly Nurmaǵambetov Saǵadat Qojahmetulyn eske alýǵa arnalǵan jıý-jıtsý kúresinen ashyq týrnır ótti.

Atalmysh týrnırge Almaty jáne Almaty oblysynda jıý-jıtsýmen aınalysatyn 5-17 jas aralyǵyndaǵy 150-den astam jasóspirim qatysty. Júzden júırik shyqqandar arnaıy dıplom, medal jáne arnaıy syılyqtarmen marapattaldy. Sondaı-aq týrnırge kelgen qonaqtarǵa estelik syı retinde Nurmaǵambetov Saǵadat Qojahmetuly týraly jazylǵan kitaptar tabystaldy. Jastar dodasynyń saltanatty ashylý rásiminde alǵysóz Almaty oblysy, İle aýdany máslıhat depýtaty Daýtalıev Ǵanı Saýytbekulyna buıyrdy. Ǵanı Saýytbekuly óz sózinde: «Elbasynyń «Bolashaqqa baǵdar: rýhanı jańǵyrý» maqalasyn júzege asyrý sheńberinde osyndaı sporttyq sharalar aldaǵy ýaqytta kóptep uıymdastyrylady. Sport – jastardy rýhanı baıytyp, patrıottyq sezim qalyptastyratyn birden bir kúsh» - dep aıta ketti. İle aýdanynyń dene shynyqtyrý jáne sport bóliminiń bas mamany Qabdykárimov Jánibek Bolathanuly jáne Ashybulaq aýyldyq okrýgi ákiminiń orynbasary Meıirmanov Erlan Saıranuly jarysqa qatysýshylarǵa sáttilik tiledi. Jarystyń qurmetti meımany bolǵan İle aýdandyq aýǵan soǵysynyń ardagerleri men múgedekteriniń erikti qoǵamynyń tóraǵasy, «Qyzyl juldyz» ordeniniń ıegeri Qarajigitov Marat Jubaıbekuly týrnırdiń maqsatyn jastarǵa túsindire ketti. Saǵadat Qojahmetulynyń eline sińirgen eńbegi, halqyna qylǵan qyzmeti týraly keńinen aıta ótti. Bul týrnır erteńgi bolashaǵymyz jasóspirimder úshin úlken ónege bolǵany sózsiz. 

Álem arenalarynda elimizdiń kók baıraǵyn jelbiretip, án uranymyzdy asqaqtatyp júrgen aralas jekpe-jek juldyzdary Qaırat Ahmetov (Qazaq) jáne Qýat Hamıtov (Naıman) arnaıy qonaq bolyp shaqyrtyldy. Jasóspirimderdi jigerlendirý maqsatynda osy týrnırdyń marapattaý rásimi qazaqtyń «qos batyryna» buıyrdy. Osyndaı chempıondardyń qolynan medal alý jas sportshylar úshin úlken qýanysh bolǵany ańyq. 

Jıý-jıtsý elimizge jańadan kelgen sport túri bolǵanyna qaramastan qarqyndy damyp kele jatyr. Oǵan dálel, bıyl Túrkimenstan astanasy Ashhabatta ótken Azıa oıyndarynda jıý-jıtsýdan elimizdiń sportshylary júldeli oryndarǵa ıe boldy. Álem jáne Azıa chempıonattarynan da jıý-jıtsý palýandary qur qol qaıtpaıtyny anyq. Osy sport túrine memleket tarapynan da úlken qoldaý kórsetilip keledi. Elimizde jylyna birneshe ret aýqymdy deńgeıde halyqaralyq jarystar uıymdastyrylyp turady. 

 Halyq Qaharmany, QR tuńǵysh qorǵanys mınıstri, armıa generaly Nurmaǵambetov Saǵadat Qojahmetulyn eske alýǵa arnalǵan týrnırdi uıymdastyrǵan – elimizge tanymal sportshy, grepplıngten Azıa chempıony, aralas jekpe-jekten halyqaralyq «Alash pride» týrnıriniń birneshe dúrkin chempıony, jıý-jıtsýdan QR chempıony Nursultan Orynbasarov. Sondaı-aq, Nursultan Orynbasarov Almaty oblysy, İle aýdanynda jıý-jıtsý jáne grepplıng kúresi boıynsha 80-nen astam shákirt tárbıeleýde. «Ustazy jaqsynyń – ustamy jaqsy» demekshi shákirtteri de jarystardan júldeli oryndarmen oralýda. Atap aıtsaq, Mádı Qurmanǵojaev, Eljan Jumadil BAÁ Abý-Dabı qalasynda ótken jıý-jıtsýdan álem chempıonatynda chempıon atandy. Osyndaı jetistikteriniń arqasynda ózge de qatarlastaryna úlgi bolýda, muny kórgen basqa jasóspirimder tarapynan sportqa degen qyzyǵýshylyq artyp, jıý-jıtsýmen aınalysýǵa bet burǵan jastardyń sany kóbeıýde. 

Týrnır uıymdastyrýshy Nursultan Orynbasarov: «Aýyldyq jerlerde osyndaı sharalar jıi ótkizilip turýy shart. Sebebi, aýyl jastarynyń sportqa degen qyzyǵýshylyǵyn arttyrady. Ult maqtanyshy Nurmaǵambetov Saǵadat Qojahmetulynyń qurmetine arnap «Saǵadat batyr» jıý-jıtsý klýbyn ashqan bolatynmyn. Atalmysh klýbta 80-ge jýyq jasóspirimder jattyǵý jasaýda. Aldaǵy ýaqytta jylyna bir ret Jıý-jıtsý kúresinen «Saǵadat batyr» halyqaralyq týrnırin uıymdastyryp otyrý josparda bar. Batyr-larymyzdy jasóspirimderge nasıhattaý bapkerlerdiń mindetteriniń biri. Osyndaı týrnırler arqyly biz shákiritterimizdi rýhanı baıytamyz. Álem chempıony atanýy úshin aldymen óz eliniń patrıoty bolýy kerek. Rýhy bıik sportshy ǵana álemdik arenalardy baǵyndyra alady». 

Aýǵan soǵysynyń ardageri, «Qyzyl juldyz» ordeniniń ıegeri Qarajigitov Marat Jubaıbekuly elimizde sporttyń damýyna úlken úles qosyp júrgen, atalmysh týrnır uıymdastyrýshysy Nursultan Orynbasarovty «Armıa generaly Saǵadat Nurmaǵambetov» medalin marapattady.

Samat Muratuly