Sochıde ótken «Valdaı» halyqaralyq dıskýssıalyq klýbynyń otyrysy barysynda Qazaqstannyń Halyqaralyq qatynastar jónindegi keńesiniń  tóraǵasy Erlan Qarın RF basshysy Vladımır Pýtınnen Sırıadaǵy ahýaldy retteý boıynsha Astana prosesiniń aralyq nátıjeleri jóninde suraq qoıdy. Budan keıingi basqa suraq qoıýshylar da osy suraqtan týyndaǵan suraýlar tóńireginde jalǵasty.

«Sizben ótken jylǵy kezdesýimiz Sırıadaǵy ahýal, Aleppo aınalasyndaǵy jaǵdaıǵa qatysty ótti. Bıylǵy jyldyń basynda Sırıadaǵy ahýaldy retteý boıynsha Astana prosesi iske qosyldy. Alǵash ret Qazaqstan elordasy - Astanada qarsy kúresýshi ártúrli taraptardyń, sondaı-aq atalmysh prosestiń kepilger elderi - Reseı, Túrkıa jáne Irannyń ókilderi kelissózder ústeline  otyrdy. Kelissózderdiń birneshe raýndy ótti, qujattar qabyldandy. Astana prosesiniń aralyq nátıjelerine qandaı baǵa berer edińiz? Jáne taǵy bir másele, qazir Taıaý Shyǵystaǵy daǵdarys jańa reńk alyp otyrǵanyn kórip otyrmyz. Men ózińiz atap ótken Soltústik Iraktaǵy kúrdterdiń referendýmy, Kerkýktegi áskerı operasıa jáne jalpy Sırıadaǵy áskerı ahýaldyń ózgerýi  týrasynda aıtyp otyrmyn. Sırıa daǵdarysyn retteý keleshegi qandaı jáne Taıaý Shyǵystaǵy jalpy ahýaldy qalaı baǵalaısyz?», - dedi Erlan Qarın.

«Sırıalyq retteý jáne Astana prosesine qatysty aıtar bolsam, eń aldymen, Qazaqstanǵa jáne Prezıdent Nazarbaevqa bizge jáne osy prosestiń ózge qatysýshylaryna Astana alańyn usynǵany úshin alǵysymdy bildiremin. Qazaqstan jaı ǵana bas qosatyn jer emes. Ol - óte qolaıly alań. Men munda Qazaqstannyń beıtarap pozısıasyn, Qazaqstannyń bul aımaqtyń qandaı da bir ishki shıelenisterine eshqashan aralaspaǵanyn, kerisinshe, bedeldi bitimger bolyp tabylatynyn aıtyp otyrmyn. Aıta keteıin,  Prezıdent Nazarbaev barlyq shıelenisýshi jáne bitimge kelýshi taraptardy kelissózder ústeliniń basynda ustap qalý úshin belgili bir jaýapkershilikti óz moınyna alǵan kezder de bolǵan. Sol úshin alǵysymyz sheksiz. Astana prosesiniń bet alysy oń, árıne, problemalar da joq emes. Biraq jalpy - pozıtıvti», - dep jaýap qaıyrdy Vladımır Pýtın.

Sondaı-aq Reseı basshysy Sırıa boıynsha eń mańyzdy máselege - qantógisti toqtatýǵa qol jetkizý múmkin bolǵanyn atap ótti.

«Túrkıa, Iran jáne Sırıa úkimetiniń ustanymynyń arqasynda ózekti máseleler boıynsha pozısıalardy jaqyndastyrýǵa múmkin boldy, bul - qantógisti toqtatý. Sondaı-aq deeskalasıa aımaqtaryn qurý, bul - Sırıa boıynsha sońǵy eki jyldaǵy jumystardyń, sonyń ishinde Astana prosesiniń basty jetistigi. Aıta keteıin, Astanadaǵy kelissózderge qatyspaıtyn, biraq qashyqtan qatysyp otyrǵan jáne bolyp jatqan prosesterge yqpal etetin ózge elder de, sonyń ishinde AQSH aıtarlyqtaı úlesterin qosýda. Biz amerıkalyq áriptestermen bul másele boıynsha ózara qarym-qatynastamyz. Olar turaqty, biraq ońaı emes, pikirtalastar da bolyp turady. Degenmen, bul yqpaldastyqtyń negatıvten buryn, pozıtıvti tustary kóp.  Osy ýaqytqa deıin biz kóp másele boıynsha bir mámilege qol jetkizip keldik, sonyń ishinde Izraıl men Iordanıa memleketteriniń múddeleri bar deeskalasıanyń ońtústik aımaǵy boıynsha. Árıne, bul proseske Saýd Arabıasy, Mysyr, Iordanıa, Katar jáne shaǵyn, biraq mańyzy joǵary kóptegen ózge elderdiń oń yqpaly tıip otyr», - dedi ol.

Atalmysh másele boıynsha perspektıvalarǵa toqtalǵan V.Pýtın,  jaqyn ýaqytta bul aımaqta lańkesterdiń kózi joıylatynyn aıtty. Sonymen qatar, deeskalasıa aımaqtaryn qurýdan keıin kelesi kezeńge ótý kózdelip otyrǵanyn jetkizdi.

«Barlyq etnıkalyq jáne dinı toptar, úkimet pen opozısıa qatysý úshin Sırıa halqynyń kongresin qurý ıdeıasy bar. Bul saıası retteýdiń kelesi mańyzdy  qadamy bolar edi», - dep túıdi RF Prezıdenti.