Almaty qalasynda Medeý aýdanynda qalalyq senbilikte aýdan ákimi men birneshe belgili tulǵalarmen aǵash otyrǵyzdy, dep habarlaıdy Qamshy.kz aqparat agenttigi.

Búgin Almatyda qala boıynsha ótip jatqan senbilikte barlyq aýdan ákimdikter ujymy men kóptegen uıymdar, jeke kásiporyndar qalany tazartý maqsatynda senbilikke shyǵýda. Osyǵan oraı Medeý aýdany ákimdigi qalanyń joǵarǵy jaǵynda aǵash otyrǵyzý jumystaryn uıymdastyryp, oǵan birneshe belgili tulǵalar, eriktiler, sonymen qatar BAQ ókilderi jumyla atsalysty.

Búgingi aǵash otyrǵyzý jumystaryn biraýyzdan kelisip, atsalysqan tulǵalardy Medeý aýdany ákimi Erjan Jumatuly Jylqybaev ózi bastap keldi. Atalmysh sharaǵa, sonymen qatar, Ǵabıt Músirepov atyndaǵy jastar teatrynyń basshysy Sábıt Ábdihalyqov, atalmysh teatr ónerpazy, akter Jomart Zeınábil, elimizge belgili júrgizýshi Aıdyn Shalqar áne ózge de tulǵalar qatysty.

Medeý aýdany ákimi Erjan Jumatuly mundaı jumystardyń qar túskenshe áli jalǵasyn tabatyndyǵyn aıtyp ótti.

«Búgin qala boıynsha senbilik ótip jatyr. Bizdiń aýdan boıynsha búgingi senbilikke 15 myńǵa jýyq adam shyqty. Onyń ishinde aýdandaǵy barlyq memleket qyzmetkerleri, aýdan halqynyń kópshiligi jáne de stýdentter qatysyp, júzden astam tehnıka jumyldyryldy.

Biz tek qana senbilik jasap qoımaı, aǵash otyrǵyzý jumystarymen de aınalysyp jatyrmyz. Búgin 50 túp aǵash ektik.

Bekembaı ózeni jaǵalaýyndaǵy saıabaqty bıyl búdjetten qarjy bólip, jóndeý jumystaryn jasadyq. Aıta keter bolsaq, Bekembaı ózeniniń aınalasynyń barlyǵy byltyr sý qatty kóterilip, sonyń saldarynan júrginshiler joly shaıylyp, ony jaýyp tastaǵan bolatyn. Bıylǵy jyly sony qolǵa alyp, qajetti qarajatty bólip, jóndeýden ótkizdik. Búginde ózen jaǵasynda aǵash otyrǵyzyp, qalany kógaldandyrýǵa barynsha atsalysyp jatyrmyz.

Budan bólek búgin aýdanymyzdaǵy barlyq saıabaqta, jalpy aýdan boıynsha senbilik ótip, aǵash otyrǵyzylyp jatyr. Aýdan halqy belsendilik tanytyp, árkim shamasy kelgenshe barynsha atsalysyp jatyr», - deıdi aýdan ákimi.

Sonymen qatar, Erjan Jumatuly bıylǵy jyly búdjetten 1,8 mıllıard teńge bólip, 120 aýlany kúrdeli jóndeýden ótkizgendigi jaıynda da aıtyp ótti.

«Bıyl jóndeýden ótken aýlalardaǵy jumystar bitýge taıap qaldy. Qala tazalyǵy úshin bul iske halyqty da jumyldyryp jatyrmyz. Búgin, mine, men aralap keldim, 120 aýlanyń barlyǵynda da senbilik ótip jatyr. Aǵashtardy aqtaý, qoqystardan, japyraqtardan tazartý, aǵash otyrǵyzý jumystary qarqyndy túrde júrýde.

Aıta keteıik, bul degenimiz tek bir ret qana jasalatyn aksıa emes, aýdanymyzda apta saıyn senbilik jasalynady. Munyń basty sebebi – biz qys mezgiline deıin, qar túskenshe búkil ózen, kólderdi, saıabaqtardy, aýlalardy qoqystardan, japyraqtardan tazartyp alýymyz qajet», - dep túıdi Erjan Jumatuly.