Demokrattar Barak Obama, Bıl Klınton men Djımmı Karter jáne respýblıkandyqtar Djordj Gerbert Býsh jáne Djordj Býsh bas qosty.
AQSH-tyń áli de tiri, burynǵy bes prezıdenti 2013 jyldan beri birinshi ret bas qosty, onyń túıtkili Amerıka men Karıbterdegi daýyldan zardap shegýshilerge qarjylaı kómek kórsetý kerektigi boldy.
Buryndary prezıdent qyzmetin atqarǵan bes saıasatker otandastaryna kómek qolyn usyný úshin Tehasta senbide túnde bolǵan One America Appeal konsertinde jınaldy.
Bul kezdesýge Donald Tramp kelmedi, ol jaı ǵana beıne jazba jiberip «Amerıkanyń halyqqa qyzmet etken syıly azamattaryna» alǵysyn bildirdi.
Aq úı Prezıdent Donald Tramp bul kezdesýge shaqyrylý-shaqyrylmaýyna baılanysty suraqqa jaýap bermedi.
7 qyrkúıekten bastalyp, kómek kórsetýge jınalǵan qarjy qazirdiń ózinde 31 mıllıon AQSH dollaryna jetti.
Barak Obama: «Burynǵy prezıdentter retinde biz zardap shekkenderdiń aıaǵynan turyp ketýine kómekteskimiz keledi» dedi.
Klınton myrza bylaı dedi: «Adamdar zardap shegip jatyr, biraq bir tehastyq aıtqandaı, bizdiń mahabbatymyz búkil Tehastaǵy sýdan da kóp».
Burynǵy prezıdentter Tehasta bolǵan Harvey daýylynan keıin-aq bas qosýdy josparlaǵan bolatyn.
Konsertte Ledı Gaga jáne tórt ret Gremmı syılyǵyn utyp alǵan Lılı Lovett syndy mýzykanttar óner kórsetti.
Al ózi kele almaı qalǵan Donald Tramp beıne jazbada bylaı dedi: «Jınalǵan qaýym bizdiń qudaı astyndaǵy uıymdasqan naǵyz bir halyq ekendigimizdi kórsetedi jáne bul bizdiń qundylyqtarymyz ben bir birimizge degen adaldyǵymyzdy ańǵartady» dedi.
