Biletinder Altynbek Sársenbaıuly stýdent kezinen Kókjaılaýǵa jaıaý shyǵýdy daǵdyǵa aınaldyrǵan desedi. Ol ylǵı da Medeý shatqalynan Kókjaılaýǵa asyp, Alma-arasan shatqalyna qaraı jaıaý serýen jasap turǵan. Tipti, Reseıde Elshi qyzmetinde bolǵanda da Almatyǵa joly túsken demalysynda Alataýdy asyp otyrǵan. Ómiriniń sońǵy jyldarynda aptasyna bir ret taý asyp kelýdi ádetke aınaldyrǵan eken. Jalǵyz Kókjaılaý emes, Shalkódege, Qaıyńsaıǵa, Alataýdyń ásem tabıǵatyna jıi serýen qurǵan. Tipti, 2005 jyly Altynbek Sársenbaıuly aýyldastarymen júzdesip: «Bir muratym – alystan aıbarlanyp kórinetin Labasy shyńyna shyǵý. Dám tartsa, keler jyldyń jazynda júzege asyrsaq», – degen eken. Alashtyń aıbarly Altekeńi 2006-nyń jazyn kóre almaı ketti. 2006 jyly 11 aqpanda Sulýsaıda qastandyqqa ushyrap qaza tapty. Alaıda Labasy shyńyn Altekeńniń izbasarlary birneshe márte baǵyndyrǵan. Altynbekti ardaqtaıtyn halqy Qumbeldiń etegindegi onyń soqpaǵymen de jyl saıyn júredi.
Búgin de memleket jáne qoǵam qaıratkeri Altynbek Sársenbaıulynyń 55 jasqa tolar týǵan kúnine oraı, marqumnyń eske alýshy dostary, shákirtteri, izbasarlary «Altynbek soqpaǵymen» júrip ótti. Marqumnyń týǵan kúni 12 qyrkúıekte qabir basynda quran baǵyshtalǵan bolatyn.
Jınalǵan 60 shaqty adam búgin tańǵy onda Medeý shatqalynan Qumbel taýyn betke alyp Kókjaılaýǵa qaraı asty. 15 shaqyrymǵa sozylatyn joldy júrginshiler 4 saǵatta júrip ótti. Eske alýshylarǵa joldyń sońy bolǵan Kazachka shatqalynda as berildi. Altynbektiń jolymen júrip ótkender arasynda 5 jastaǵy balatyn 85 jastaǵy qarıaǵa deıin bar.
As sońynda kelýshilerge alǵys aıtqan Rysbek Sársenbaıuly: «Taý adamdy shyńdaıdy. Kúsh-qýat beredi. Qıyndyqta jeńýge úıretedi. Bir jaǵynan alǵanda Altekeńniń ómiri osyndaı buralań, órli-eńisti, quz-qıaly, jartasty, shyńdy boldy. Qysqa ǵana ómir súrse de sonyń bárin kórdi. Sonyń bárinen ótti. Taý eshqashan alasarmaıdy. Taý alystaǵan saıyn bıikteı túsedi. Altekeń de sondaı, eli úshin ol úlken taý. Sizder úshin de solaı. Altynbektiń oıy alasarmaıdy, sózi men maqsaty, qurǵan jospary alasarmaıdy. Sonyń bári iske asýy kerek. Ony iske asyratyn sizder men bizdermiz. Altekeń biz úshin ómir súrdi. Halyq úshin, mynaý urpaq úshin janyn berdi. Erteńgi kúni balalarymnyń kózine týra qaraı alatyn bolaıyn, solardyń aldynda uıalmaıtyn bolaıyn dedi. Aryn-namysyn joǵary qoıdy. Sol úshin de qurban bolǵan shyǵar. Osy elimizdiń búgini jaqsy bolsyn, erteńi odan da jaqsy bolsyn, balalarymyz alańsyz, ýaıymsyz, qaıǵysyz, qıyndyqsyz, qıanatsyz bir mamyrajaı elde, qoǵamda, memlekette ómir súretin bolsyn dep armandady. Osyny qalady. Ár qazaqtyń jaqsy ómir súrgenin, bir-birine kúlip qaraǵanyn, bir-birine jaqsy sóz aıtqanyn qalaǵan edi. Altekeńniń isin endi jastar jalǵastyrady. Maǵjan aıtqandaı «men de osy jastarǵa senemin». Altekeń beker ómir súrgen joq, ómiri beker ótken joq. Ol jalǵasyn tabady», - dep aıaqtady óz sózin.
Nurǵalı Nurtaı.
