Almatyda «Rýhanı jańǵyrý» Qazaqstannyń Tuńǵysh Prezıdenti saıabaǵynda balalardy beıimdeýge arnalǵan ınklúzıvti alań ashyldy, dep habarlaıdy Qamshy.kz aqparat agenttigi qalalyq ákimdiktiń baspasóz qyzmetine silteme jasap.

Bul keshenge qajet qarajat byltyr jeltoqsanda mesenattar men «Dara» qory uıymdastyrǵan qaıyrymdylyq aýksıonynda jınalǵan edi.

«Barlyq balalarǵa qojetimdi  mundaı alańdardy Almatyda jáne basqa  qalalarda ashýdy josparladyq. Mundaı keshenderdiń jabdyqtaryn  otandyq  jetkizýshilerden alýdy uıǵarýdamyz, sonyń arqasynda Almatyda balalar úshin tegin ári  esh kedergisiz  alańdar kóp bolady degen senimdemin», - dedi «Dara» qorynyń Almatydaǵy dırektory Aınash Qasenova.

480 sharshy metr aýmaqta sozylyp jatqan alańda baldyrǵandardyń ósip- jetilýine oń áser etetin tóbeshigi jáne keń pandýsy bar oıyn kesheni, beıimdeý karýseli men qumdyq, mýzykalyq komponentter, fıtnes-trenajerler bar.

Trenajerler men oıyn elementteri vestıbýlárly jáne estý qabiletin arttyrady, dene qozǵalysy men taktılli sezinýdi jaqsartady. Aqparattyq panelder Braıldiń taktıldi shrıftin usynady,  qımyl tilin, PEKS kartochkasyn kórsetedi, erekshe baldyrǵandarǵa ózgelerdiń tilin uǵyna bilýdi úıretedi.

«Men qaıyrymdylyq sharasy barysynda osyndaı mańyzdy jobany júzege asyrýǵa jetetin qarjy jınaǵanymyzǵa maqtanamyn. Bul keshenge 20 mln teńge kóleminde qarjy jumsaldy», - dep atap ótti joba demeýshisi Janna Kan.

Qalada «Meniń aýlamdaǵy sport» áleýmettik jobasy aıasynda 5,5 myń balany qamtıtyn 75 sport alańy, al vorkaýttar úshin 28 sporttyq qondyrǵy jańartyldy. Ár aýdanda  bıyl qysta tegin muz katoktary paıda bolady.

Almaty qalasy Bilim  basqarmasynyń aqparaty boıynsha, qalada  qazirgi kezde 4 psıhologıalyq- medısınalyq konsýltasıa, 7 psıhologıalyq-pedagogıkalyq korreksıa kabıneti jumys isteıdi.

Jyl aıaǵyna deıin Naýryzbaı aýdanynda osyndaı konsýltasıa men kabınet ashý josparlanǵan. Bıylǵy jyldyń mamyr aıynda erekshe qamqorlyqty qajet etetin  azamattar úshin Almatynyń florıstıka tehnologıasy kolejiniń bazasy negizinde kásibı bilim berýdiń Resýrstyq ortalyǵy  ashylǵan edi.

Ústimizdegi jyldyń 9 aıy ishinde psıhologıalyq- medısınalyq konsýltasıada - 4576 baldyrǵanǵa, psıhologıalyq-pedagogıkalyq korreksıa kabınetinde 984 balaǵa qajetti  kómek  kórsetildi.