Almaty oblysy, Eńbekshiqazaq aýdany, Esik qalasyndaǵy Jastar saıabaǵynda Jambyl Jabaevtyń, al, Mádenıet úıiniń aldyndaǵy gúlzarda Tumanbaı Moldaǵalıevtiń eskertkishi ashyldy, dep habarlaıdy Qamshy.kz aqparat agenttigi «Egemen Qazaqstan» gazetiniń saıtyna silteme jasap habarlaıdy.
Qos alyptyń bir kúnde ashylǵan músinderiniń saltanatty jıynynda oblys ákiminiń orynbasary Jaqsylyq Omar:
– Elbasymyz Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda «Ulttyq mádenıet saqtalmasa, eshqandaı jańǵyrý bolmaıdy» degen edi. Búgingi sharany ulttyq mádenıetke arnalǵan ıgi isterdiń bir parasy dep bilińizder. Ótken jyly Serbıanyń Belgrad qalasynda Jambyl babamyzǵa eskertkish ornatyldy. Búgingi shara sonyń zańdy jalǵasy, – dedi.
Budan keıin Qazaqstan Jazýshylar odaǵy basqarmasynyń tóraǵasy, aqyn Nurlan Orazalın sóz sóıledi:
– Esik óńiri – qasıetti jer. Onda ejelgi babalarymyzdyń súıekteri jatyr. Saq, úısin dáýirinen qalǵan jádigerler solar jaıly bizge syr shertip turǵandaı. Altyn adam búkilalashtyq ortaq sımvolǵa aınaldy. Osy jerde uly jyraýdyń eskertkishiniń ashylǵany jaqsylyqtyń nyshany. Jambyl urpaqtary atynan Áskerbek Abaev sóz alyp, baba murasynyń búgingi urpaqtarmen qaýyshyp jatqanyn, jyr alybynyń qazaqpen birge máńgi jasaıtynyn, búgingi saltanat sonyń dáleli ekenin tilge tıek etti. Bıiktigi 5 metr, tuǵyry granıtten quıylǵan Jambyl babamyzdyń qola músinin jasaǵan Nurǵalym Isabaev. Sáýletshileri – Jangeldi Osan men Seıithan Qyrqynbaev. Jaqsylyq Omar, Nurlan Orazalınder sóz sóılep, aqynnyń qazaq ádebıetinen alar orny men el rýhanıatyndaa sińirgen ornyna toqtalyp, sóz sóılese, Shómishbaı Sarıev aqynǵa arnaǵan óleńin oqydy. M.Áýezov atyndaǵy ádebıet ınstıtýtynyń dırektory, fılologıa ǵylymdarynyń doktory Ýálıhan Qalıjan aqyn jaıly estelikter aıtty. Kezinde Tumaǵańnyń ózi qyzmet etken «Baldyrǵan» jýrnalynyń bas redaktory Dúısen Maǵlumov bastaǵan jýrnalıser qaýymy da aqynǵa qurmet kórsetti. Aqynnyń jary Kúltaı apa bul sharany uıymdastyrýshylarǵa, kópshilikke rızashylyǵyn bildirip, alǵys aıtty. Tumanbaı beınesiniń músinshisi – Altaı Beısenov. Sáýletshisi – Qurmanǵazy Qadyrov. Saltanatty jıynnyń sońy merekelik konsertpen jalǵasty. Belgili óner qaıratkerleri Nurǵalı Núsipjanov, Maqpal Júnisova, Sulýshash Nurmaǵanbetovalar bastaǵan ónerpazdar án shyrqap, elge qutty bolsyn aıtty.
Almas NÚSİP
