Almatyda grek-rım kúresinen «Bolat Turlyhanov Kýbogy» Halyqaralyq týrnıri márege jetti. Eki kúnge sozylǵan dástúrli týrnırde 17 eldiń balýandary baq synap, Olımpıada baǵdarlamasyna kirgen 6 salmaq dárejesi boıynsha jeńimpazdar men júldegerler anyqtaldy.
Buǵan deıin habarlaǵanymyzdaı, baıraqty dodada el namysyn 70-ten astam balýan qorǵady.
Týrnırdiń uıymdastyrý komıtetinen málim etkendeı, jarys qorytyndysy boıynsha Qazaqstan balýandary 1 altyn, 2 kúmis, 3 qola medal jeńip aldy.
Keshe jarystyń birinshi kúni ótip, onda 59, 75 jáne 98 keli salmaq sanattary boıynsha jeńimpazdar anyqtaldy. Búgin qalǵan úsh salmaq dárejesinde myqtylar belgili boldy.
66 keli salmaqta kil myqtylar beldesti. Almat Kebisbaev, Danıar Qalenov sıaqty kóptegen halyqaralyq týrnırlerde olja salǵan elimizdiń balýandaryn aıtpaǵanda, jaqynda ǵana Parıjde ótken álem chempıonatynda jeńimpaz atanǵan ońtústikkoreıalyq Rú Han Sý da Bolat Turlyhanov atyndaǵy týrnırge arnaıy at basyn burypty. 66 keli sanatynda bas júldeden birden-bir úmitker osy káris balýany bolatyn. Biraq, týrnır deńgeıiniń joǵary bolǵandyǵy sonshalyq, álem chempıony degen ataqpen kelgen Rú Han Sý eline júldesiz qaıtty. Álem chempıonyn jartylaı fınalda Danıar Qalenov utty - 1:0. Danıar ótken aptada ǵana Ashhabadta aıaqtalǵan jabyq keshendegi Azıa oıyndarynda jeńimpaz atanyp qaıtqany barshamyzǵa belgili. Bolashaǵynan zor úmit kúttiretin balýan osy týrnırde aldyna jan salǵan joq. Fınalda ol elimizdegi tájirıbeli balýandardyń biri - Almat Kebisbaevty jeńdi - 5:3. Almat ta osy týrnırde osal bolmady. Kóp kúsh jumsady. Tipti 1/8 fınalda Polshadan kelgen Roman Posrkovskıden 1:7 esebimen utylyp jatyp, sońǵy bir mınýt qalǵanda polák balýanyn taza utyp ketti. Bul salmaqta qola júldeni reseılik balýandar - Pavel Saleev pen Arsen Mırzoıan jeńip aldy.
85 kelide ókinishke qaraı, qazaqstandyq balýandar júlde ala almady. Ýkraınalyq Jan Belenúk sheshýshi synda grýzıalyq Robertı Koblıashvılıden 5:1 esebimen aılasyn asyryp, týrnır jeńimpazy atandy. Qola júlde Nıkolaı Stadýb (Belarýs) pen Lasha Gobadzeniń (Grýzıa) enshisinde.
Asa aýyr salmaqta, ıaǵnı, 130 kelidegi alyptar arasyndaǵy básekede Grýzıa balýandary des bermedi. Fınalda qos birdeı grýzıalyq - Levan Arabýlı men Zvıadı Patarıdzeniń arasyndaǵy aıqas 3:1 esebimen alǵashqysynyń paıdasyna sheshildi. Grýzıa quramasy bul týrnırge birinshi jáne ekinshi nómirli balýandaryn alyp kelgenin aıta keteıik. 130 kelide úmit artqan balýanymyzdyń biri Nurmahan Tinálıev bolatyn. Ókinishke qaraı, Nurmahan jartylaı fınalda Zvıadı Patarıdzeden utylyp qaldy. Qola medal úshin bolǵan beldesýde ońtústikkoreıalyq balýannan aılasyn asyrdy.
Sonymen eki kúnge sozylǵan jarys máresine jetti. Alty salmaq dárejesinde ótken halyqaralyq týrnırdiń bas júldeleri alty elge ketti. 59 keli salmaqta - Ońtústik Koreıa, 66 kelide - Qazaqstan, 75 kelide - Túrkıa, 85 kelide - Ýkraına, 98 kelide Reseı balýany top jarsa, asa aýyr salmaqtyń altyn medali Grýzıaǵa jol tartty.
