Almaty qala qurylysy keńesi kóppáterli úsh turǵyn úı kesheniniń jáne bıznes ortalyǵynyń qurylysyn maquldady.

Osy nysandardy salýǵa 74,8 mlrd. teńge kóleminde jeke ınvestısıa tartylady.

Qalada ıgerilmegen 9,9 ga jerde jalpy aýmaǵy 188 myń sharshy metr turǵyn úı boı kóteredi. Paıdalanýǵa 2787 oryndyq avtoturaq pen tórt orta bilim beretin mektep beriledi.

Bostandyq aýdanynda 21 qabatty «Seıfýllın» turǵyn úı kesheniniń qurylysy bastalady. Keshen ishinde 120 oryndyq balabaqsha ornalasady.

Jobada landshaftyq aýlalarmen usynylǵan jerasty avtoturaq bar. Qurylys jumystary 25 aı ishinde aıaqtalady.

Kompanıa áleýmettik jaýapkershilik aıasynda 160 orynǵa arnalǵan balabaqsha salyp, ony komýnaldyq menshikke bermek.

Sátbaev pen Abaı dańǵyldarynyń arasynda Tilendıev kóshesiniń batysyna qaraı 12 jáne 16 qabattyq 19 turǵyn úı kesheni salynady. Keshen aýmaǵy úsh aımaqqa bólingen. Onyń ishine aýla, qoǵamdyq keńistik jáne 200 oryndyq qoljetimdi balabaqsha bolady. Qurylys jumystaryna 36 aı ýaqyt berilgen.

Sonymen qatar, Bostandyq aýdanynda Ál-Farabı dańǵyly men Rozybakıev kóshesiniń qıylysynda Park-ofıs jobasy iske asyrylatyn bolady.

Ál-Farabı dańǵylynan joǵary aımaqta qurylysqa tyıym salynǵandyqtan, ǵımarattyń bıiktigi 12 metrden aspaıdy.

Áýezov aýdanyndaǵy №3 shaǵyn aýdanda tórt 9 jáne 12 qabatty turǵyn úı kesheni paıda bolady. Keshende eki deńgeıli jerasty parkıng pen 60 orynǵa arnalǵan balabaqsha salý josparlanǵan. Nysandar 20 aıda boı kóteredi.

Jobalardy qaraý barysynda basty basymdyq kólik turaǵy sanyna, ishki árleý jumystaryna sapaly materıaldardy paıdalanýǵa, úılerdiń syrtyn jaryqtandyrýǵa, kishimobıldi toptarǵa jaǵdaı jasaýǵa, alańdardy jasyldandyrýǵa beriledi.