Nursultan Nazarbaev Vladımır Pýtındi Qazaqstan Respýblıkasy men Reseı Federasıasy arasyndaǵy dıplomatıalyq qarym-qatynastyń ornaǵanyna 25 jyl tolýymen quttyqtady dep habarlaıdy Qamshy.kz aqparat agenttigi.
«Bizdiń memleketaralyq qarym-qatynastarymyz 2013 jylǵy 11 qarashadaǵy HHİ ǵasyrdaǵy tatý kórshilestik pen odaqtastyq týraly ekijaqty sharttyń aıasynda jáne sonyń erejelerine saı damyp kele jatqany qýantady.
Elderimiz arasyndaǵy Eýrazıalyq ekonomıkalyq odaq, Ujymdyq qaýipsizdik shart uıymy, TMD, SHYU, BUU jáne basqa da kópjaqty qurylymdar aıasyndaǵy yntymaqtastyq Astana men Máskeýdiń senim men ózara túsinistikke negizdelgen strategıalyq áriptestigin damytýdyń mańyzdy bóligi bolyp sanalady.
Men aramyzda qalyptasqan shynaıy jeke qarym-qatynasty da joǵary baǵalaımyn. Bul rette, yntymaqtastyǵymyzdy odan ári nyǵaıtý baǵyty halyqtarymyz tarapynan keńinen qoldaý taýyp otyrǵany mańyzdy», – delingen jedelhatta.
Sońynda Qazaqstan Prezıdenti Reseı Prezıdentine zor densaýlyq, alǵa qoıǵan josparlaryn júzege asyrý jolynda tolaǵaı tabys tilep, dostas Reseı halqynyń odan ári ósip-órkendeýine nıettestik bildirdi.
