Ýkraınanyń Kıev oblysynda qazaqstandyq jýrnalıs ári bloger Janar Ahmet qamaldy,-dep Qamshy.kz aqparat agenttigi Azattyqtyń Ýkraın redaksıasyna súıene otyryp habarlaıdy. Janar Ahmettiń advokattarynyń biri Vladıslav Grıshenkonyń Azattyqqa aıtýynsha, jýrnalıs Interpoldyń izdeýi boıynsha 21 qazanda ustalyp, Vyshgorod qalasynda ýaqytsha tergeý ızolátoryna jabylǵan.
"Ony Kıev oblysynyń Kıevo-Svátoshınskıı aýdanynda ustap, hattama toltyrdy. Qazaqstan Ahmetke Qylmystyq kodeksiniń 177-baby ("Alaıaqtyq") boıynsha Interpolmen izdeý jarıalap, sol boıynsha ustalǵan. Qazir ol Vyshgorodtyń ýaqytsha tergeý ızolátorynda otyr" dedi advokat.
Grıshenkonyń sózinshe, 23 qazanda Kıevo-Svátoshınskıı aýdandyq soty Ahmetti ekstradısıalaý máselesi qaralǵansha bultartpaý sharasyn belgileıdi.
Advokattyń aıtýyna qaraǵanda, Ahmettiń kámeletke tolmaǵan balasy Ýkraınada jýrnalısiń týystary joq bolǵandyqtan, tanystarynyń qaraýynda.
Kıev oblysy polısıasynyń ókili Nıkolaı Jýkovıch jýrnalısiń tutqyndalǵanyn rastady.
"Ol Vyshgorodtyń ýaqytsha qamaý ızolátorynda otyr. Ol Ýkraına Qylmystyq-prosessýaldyq kodeksiniń 208-baby ("Ýákiletti laýazymdy tulǵanyń ustaýy" boıynsha, Interpoldyń izdeýinde júrgendikten ustaldy. Erteń, ıa arǵy kúni ony sotqa aparyp, bultartpaý sharasyn taǵaıyndaıdy" dedi Jýkovıch.
Janar Ahmettiń ózi Facebook-te 23 qazanǵa deıin sotty kútetinin jáne ózin qoǵam qoldaıtynynan úmittenetinin jazdy. Janar Ahmet ózine taǵylǵan aıyptyń saıası astary bar dep sanaıdy.
Almatyda turǵan, bıliktiń probasıalyq baqylaýynda bolǵan bloger Janar Ahmet balasymen birge Ýkraınaǵa bıyl kóktemde qashyp barǵan.
Janar Ahmet opozısıalyq "Trıbýna. Saıası qalam" gazetinde maqala jazyp turǵan jáne áleýmettik jeliler arqyly qazaqstandyq bıliktiń atyna synı pikirler jarıalaıdy.
