QR Syrtqy ister mınıstri Qaırat Ábdirahmanov Qyrǵyz Respýblıkasynyń Premer-Mınıstri Sapar Isakovtyń Qazaqstanǵa sapary aıasyndaǵy kelissózderdiń negizgi baǵyttary jaıynda aıtyp berdi. Bul týraly Qazaqparat habarlaıdy, dep jazady Qamshy.kz aqparat agenttigi.

«Úkimet basshylary arasynda qol jetkizilgen ýaǵdalastyqtarǵa sáıkes, sapar resmı ári mazmundy jaǵynan joǵary deńgeıde ótti. Bishkekten úlken delegasıa kelgendigin atap ótken jón»,- dedi mınıstr.

Q. Ábirahmanovtyń sózine qaraǵanda, qol qoıylǵan hattamaǵa sáıkes, Qazaqstan men Qyrǵyzstannyń Premer-Mınıstrleriniń birinshi orynbasarlarynyń basshylyǵymen jumys toby quryldy. Olarǵa bes kúnniń ishinde «Jol kartasyn» qurý tapsyryldy.

«Kelissózder konstrýktıvti dárejede ótti, ıaǵnı talqylaýdy qajet etetin máseleleler jan-jaqty qaraldy. Qazaqstan tarapy kezekti ret sońǵy jyldary birneshe márte kóterilgen problemalarǵa toqtaldy. Bul másele Qyrǵyzstan arqyly Eýrazıalyq ekonomıkalyq odaq elderine Qytaıdan taýarlardyń «surǵylt» ımportyna baılanysty boldy»,- dep túsindirdi Ábdirahmanov.

Sonymen qatar qazaqstandyq taýarlardy satýǵa qatysty Qyrǵyzstanda engizilgen shekteý sharalary talqylaýǵa arqaý boldy. Syrtqy ister mınıstriniń aıtýynsha, eki eldiń Premer-Mınıstrleri  EAEO úkimet basshylary otyrysy aıasynda Erevanda taǵy da kezdesetin bolady.

Budan buryn habarlanǵandaı, Qazaqstan Respýblıkasynyń Premer-Mınıstri Baqytjan Saǵyntaev pen Qyrǵyz Respýblıkasynyń Premer-Mınıstri Sapar Isakovtyń keńeıtilgen jáne shaǵyn formattaǵy kezdesýi ótti. kelissózder qorytyndysy boıynsha, taraptar 19 qazan kúni saǵat 00-00-de qazaq-qyrǵyz shekarasynan júkteri bar jeke tulǵalar men turaqty júretin reıstik avtobýstardyń, jeńil kólikterdiń, júk kólikteriniń ótýiniń basym baǵyttarynyń tártibin qamtamasyz etý jóninde kelisimge keldi. 

Kezdesýler barysynda EAEO pen DSU normalary men tártipterine sáıkes, shekara, kólik, fıtosanıtarlyq jáne veterınarlyq baqylaý, kedendik jáne salyqtyq ákimshilendirý máseleleri qaraldy.