Ony alǵash medresemizge anasy ertip kelgendi. Qujattaryn qabyldaý barysynda esimin suraǵanymda «Fatıma», — dep jaýap bergen bolatyn. Artynsha:

— Eger meni qarı ete almaıtyn bolsańyzdar, shákirt bolýdan bas tartamyn, — dep, bizdi biraz sastyrǵany áli esimde. Yntasyna ishteı tańyrqap:

— Sen esh ýaıymdama, qalasań qarı bolyp ta, ustaz bolyp ta shyǵasyń!.. – dedim.

Muny estigende Fatımanyń júzi bal-bul jaınap ketti. Anasy sózge aralasyp:

— Qyzym balalyqpen artyq sóılep qoısa, aıypqa buıyrmaǵaısyz. Jatsa da, tursa da bar aıtary qarılyq. Aýyl moldasynan estise kerek, hadıste: «Qurandy bastan aıaq jattaǵandarǵa aqyrette jaquttan táj kıgiziledi» delinegen eken. Bul jaıynda endi bizdiń bar bilerimiz osy, sizder bizge qaraǵanda artyq bilesizder ǵoı.

— Ol ne degenińiz? Bizdiń de bilgenimiz bir toǵyz, bilmegenimiz toqsan toǵyz ǵoı.  Barlyq adam siz sekildi bilgenine amal etse  ıgi edi... Esh alań bolmańyz, qyzyńyzdy amanat dep qabyldaımyz.

Ýaqyt óte berdi. Fatıma alǵashqy kúnderden-aq zerektiligimen, ádeptiligimen meniń jan dúnıemdi baýrap aldy. Ózi qatar basqa shákirtter uıyqtap nemese basqa tirliktermen shuǵyldanyp jatqanda ol Qurannan bas almaıtyn. Birde maǵan kelip:

— Ustaz, qarı bolý úshin Qurandy tolyǵymen jattaý shart pa? – dep surady. Men de:

— Álbette, solaı... Qarı ataný úshin barlyq aıatty jattaýyńa týra keledi, — dedim.

Bul jaýabym bala kóńilin jyqqandaı bolyp kórindi... Eshteńe demesten synyptan shyǵyp ketti. Araǵa kóp ýaqyt salmaı syrqattaný sebebinen birneshe dáristi jiberip aldy. Sabaqtan qalýy údegesin ýaqyt taýyp sóılesýge tyrystym. Oǵan baryp:

— Saǵan ne boldy? Álde ata-anańdy saǵyndyń ba? , — dep suradym. Tosyn suraǵyma qatqyl daýyspen:

— Joq! – dedi.

— Olaı bolsa ne úshin kóńilsizsiń? Jıi naýqastanyp ta júrsiń, – degenimde:

— Meni qate túsinbeńiz. Bul jer maǵan óte qatty unaıdy. Medreseni tastap ketýge qalaısha qımaqpyn?! Ondaı qadamǵa barýǵa áýeli Alladan qorǵamyn. Bergen múmkindikti paıdalanyp, dinı saýatymdy arttyrmasam, aqyrettegi jaǵdaıym qandaı bolmaq... – dep, kózderinen monshaq jastar domalaı tústi.

Aıtýyn aıtsam da, artynan ókinip qaldym. Bir jaǵynan qatty tańyrqadym. Kip-kishkene júrekte munshalyqty kemel ıman qalaısha oryqqan deseńizshi... Araǵa eki kún salyp Fatıma tósek tartyp jatyp qaldy. Aýrýhanaǵa aparýǵa týra keldi. Dárigerler em-domyn jasady. Tanys dárigerim bólmesine kirgizip, tez arada Fatımany úıine qaıtarý kerektigin aıtty. Nege dep suraǵanymda: «Tipti aıtýǵa da qıyn, qyz aqqan aýrýymen aýyrady» degen jaýap aldym. Ústime bireý muzdaı sý quıyp jibergendeı sizindim. Óz qulaǵyma ózim senbeı abdyrap turǵan ornymda qatyp qalyppyn... Fatımanyń janyna barǵanymda solǵyn tartqan erinderi jybyrlap:

— Ustaz, Ázireıil adamdardyń janyn alýǵa kelgende, qandaı keıipte bolady? – dep surady. İshim qan jylap tursa da, bildirmegen keıippen:

— Múmin quldarǵa ásem beınede kórinedi – dep jaýap berdim. Kenet júzin jas jýyp ketti. Óksik aralas álsiz daýysymen:

— Múmkin, qarı bola almaspyn, alaıda Allaǵa shúkir musylmanmyn! – dedi.

Qarı bolý úshin búkil Qurandy jattaý kerektigin aıtqanymda nelikten jabyrqaǵanyn endi túsindim.  Demek perishte kóńili syrqatyn bilgen eken.

Alystaǵy aýyldan jedeldetip anasy da jetti. Fatıma zattaryn jınastypyp bolyp, janyma keldi. Baıypty qalpynsha:

— Sizdi renjitip almadym ba? – dep surady.

— Ol ne degeniń, ne dep renjımin saǵan. Sen, «qarılyǵymdy bitire almadym» dep áste qamyqpa. Táýekel etip osy jolǵa túsken ekensiń, Meıirimi sheksiz Alla nıetińe qaraı qarılardyń sanatyna qosyp qoıady, Insha Alla! Qatty qýanyp moınyma asyldy. Kózderinen qýanyshtyń jasy móltildep:

— Rasymen, qarılardyń qataryna qosylýym múmkin be? – dep surady.

— Qudaı qalasa!

— Anashym, estidiń be? Estidiń be?..

Osylaısha qıar da qımaı Fatımany úıine shyǵaryp saldyq. Syrqatynan aıyǵyp qaıta kelýinden úmittendim. Hat almasyp turdyq. Kezekti bir hatynda jaquqttan jasalǵan tájdi kıgenin túsinde kórgendigin baıandapty.  Qatty qýandym.

Bir kúni aqsham namazynan keıin telefonym shyryldaı ketti. Tutqanyń arǵy jaǵynan óksikke toly Fatımanyń anasynyń daýsy shyǵyp jatty.

— Ustaz, Fatımadan aırylyp qaldyq... – degeninde, men de óz-ózimdi ustaı almadym.  Anasy sózin jalǵastyryp:

— Jantásilim eter aldyn sizge myna sózin jetkizýimdi ótindi: «Anashym, ustazyma aıtyńyzshy... Ázireıil (a.s.) biz oılaǵannan da sulý eken...»

Aýdarma jasaǵan: Keńesbekov Qojahmet