«Depýtatskıı korpýs» atty uıymdasqan qylmystyq toptyń jetekshisi, burynǵy kásipker Murathan Toqmadı 2004 jyly jeltoqsanda belgili bankır Erjan Tátishevti qashqyn olıgarh Muhtar Áblázovtyń tapsyrysy boıynsha óltirgenin ashyq málimdedi. «KTK» telearnasynan kórsetilgen derekti fılmde Murathan Toqmadı M. Áblázovpen qalaı sybaılas bolǵany týraly barlyq shyndyqty aıtty. Qashqyn olıgarh M. Toqmadıdy Erjan Tátishevti óltirip, «TuranÁlembanktiń» aksıalar paketine ıe bolý úshin paıdalanady. Ol ýaqytta bank TMD kóleminde kóshbasshylyq deńgeıge jetip, onyń basqarma tóraǵasy, bilikti qarjyger Erjan Tátishevtiń bedeli óte joǵary bolatyn. Alaıda qashqyn olıgarhtyń aınalasyndaǵy adamdardyń aıtýynsha, mundaı jaǵdaı Muhtar Áblázovke unamaǵan kórinedi. Murathan Toqmadı «tapsyrmany» tıanaqty oryndaǵannan keıin, kóp uzamaı Muhtar Áblázov «TuranÁlembanktiń» basshylyǵyna keledi. Bulaı bolýy zańdy da edi. M. Toqmadı sıaqty «aqyldy» sybaılasty qarmaǵyna túsirgen Áblázov «syı» retinde Tátishevtiń kezinde Toqmadıdyń bankten alǵan qaryzyn «keshiredi». Onymen qosa, Murathan Toqmadıdy óziniń qylmystyq álemine qosyp, onyń atyna ofshorlyq aımaqtardan jalǵan kompanıa ashyp beredi.