Búgin Aqordada Elbasy Nursultan Nazarbaev latyn qarpine negizdelgen qazaq álipbıiniń sońǵy jobasyn bekitý týraly Jarlyq daıyndaýǵa tapsyrma berdi. Osy oraıda QR Parlamenti Májilisiniń depýtaty, «Aq jol» partıasynyń jetekshisi Azat Perýashev atalǵan máselege qatysty pikir bildirdi, dep Qamshy.kz aqparat agenttigi Baq.kz-ke silteme jasap habarlaıdy.
«Búgin Elbasy Nursultan Nazarbaevtyń latyn álipbıin qabyldaý týraly Jarlyq daıyndaýǵa tapsyrma bergenin jańalyqtardan bildim. Qazaq tiliniń latyn álipbıine kóshýin «Aq Jol» partıasy da qoldaıdy. Bul bizdiń partıamyz úshin mańyzdy máselelerdiń biri. Atalǵan másele partıanyń saıası baǵdarlamasynda 2007 jyldan beri boldy. Sondyqtan qazaq tiliniń latyn álipbıine kóshý – óte oryndy, onyń tarıhı mańyzy zor. Sondyqtan atalǵan bastamany qoldaımyz», - dedi halyq qalaýlysy.
Osy oraıda Azat Perýashev qazaq tiliniń latyn álipbıine kóshýi halyq arasynda qyzý talqylanǵanyn atap ótti.
«Elbasymyzdyń tapsyrmasy boıynsha jalpy latyn qarpine negizdelgen qazaq álipbıiniń jobasy halyq arasynda qyzý talqylandy. Atalǵan jobaǵa kez kelgen azamat óz pikirin aıtýǵa, usynysyn engizýge quqyǵy boldy. Men de oǵan óz usynysymdy aıttym. Basqa da meniń áriptesterim komısıaǵa óz usynystaryn jetkizdi. Osyndaı ótkir pikir almasýdan keıin qazaq tiliniń latyn álipbıindegi ekinshi nusqasy daıyndaldy. Sondyqtan Elbasymyzdyń latyn qarpine negizdelgen qazaq álipbıiniń sońǵy jobasyn bekitý týraly Jarlyq daıyndaýǵa bergen tapsyrmasyn qoldaımyz», - dedi ol.
Sóz sońynda depýtat latyn qarpine negizdelgen qazaq álipbıiniń sońǵy nusqasy qolaıly ekenin atap ótti.
«Qazaq tiliniń latyn álipbıindegi sońǵy nusqasyn birinshisimen salystyrsaq, sońǵysy qoldanýǵa yńǵaıly. Biraq onyń aǵylshyn tilindegi álipbıden aıyrmashylyǵy bar. Mysaly, aǵylshyn tilinde «j» - «zh», «sh» - «sh» dep eki árippen jazylady. Al biz bir árippen jazatyn boldyq. Endi oǵan da úırenemiz. Eń bastysy – qazaq tiliniń latyn álipbıindegi sońǵy nusqasy túsinikti», - dep túıindedi sózin Azat Perýashev.
