Almatyda Pedıatrıa jáne balalar hırýrgıasy ortalyǵynyń ashylǵanyna 85 jyl tolýyna oraı saltanatty jıyn ótedi. Onda balalar densaýlyǵyna qatysty ózekti taqyryptar talqylanbaq.
Qazaq balalar hırýrgıasynyń atasy Kamal Ormantaev, akademık Tóregeldi Sharmanov, medısına ǵylymdarynyń doktory, profesor Tamara Chývakova syndy tanymal dárigerler qatysatyn jıynda pedıatrıa jáne balalar hırýrgıasy ǵylymı ortalyǵynyń ótkeni men búgini, jetistigi men damýy, elimizdegi pedıatrıalyq qyzmettiń baǵyt-baǵdary saralanbaq.
Saltanatty jıyn aıasynda konferensıa ótip, pedıatrıanyń ózekti máseleleri, onkologıalyq, gematologıalyq kómek berýdi uıymdastyrý, zerthanalyq qyzmettiń, balalar kardıohırýrgıasy qyzmetiniń damýy, onkologıalyq aýrýlarǵa shaldyqqan balalardy ońaltýdyń búgingi jaǵdaıy syndy balalardy emdeýdegi ózekti meseleler talqylanady.
Mereıtoılyq sharaǵa ana men bala saýlyǵyna ólsheýsiz úles qosqan ardager-dárigerler, ortalyqtyń seriktesteri men áriptes-dostary, qazaqstandyq medısınalyq mekemelerdiń basshylary, Pedıatrıa ortalyǵy ujymy men basshylyǵy qatysady.
Shara aıasynda ortalyqta uzaq jyldar qyzmet atqarǵan, el bolashaǵy-balalar men nárestelerdi emdep, ult densaýlyǵyn jaqsartýǵa ólsheýsiz úles qosqan ardager-dárigerlerdi marapattaý rásimi ótedi.
Aıta keteıik, Pedıatrıa jáne balalar hırýrgıasy ortalyǵynyń negizi 1932 jyly 28 qarashada Ana men bala densaýlyǵyn qorǵaý ǵylymı zertteý ınstıtýty retinde qalanǵan. Atalǵan ortalyq balalardyń densaýlyǵyn qorǵaýda qol jetkizgen jetistikteri úshin Halyqtar Dostyǵy ordenimen jáne «Sapa úshin Eýropalyq Gran Prı» halyqaralyq baıqaýynyń «Medısına salasynyń kóshbasshysy» Bas júldesimen marapattalǵan. Saltanatty shara 27 qazan kúni «Pedıatrıa jáne balalar hırýrgıasy ǵylymı ortalyǵynda ótedi.
