Búgin ál-Farabı atyndaǵy Qazaq ulttyq ýnıversıteti Halyqaralyq qatynastar fakúltetiniń jáne Qazaq-nemis ýnıversıtetiniń otyzdan asa stýdenti adam quqyqtary boıynsha «EO shaǵyn modeli - 2017» ınteraktıvti oıynyna qatysty, dep habarlaıdy Qamshy.kz aqparat agenttgi Qazaqstandaǵy EO ókildigine silteme jasap.
İs-shara Qazaqstandaǵy Eýropalyq Odaqtyń ókildigi jáne ál-Farabı atyndaǵy QazUÝ-men birge uıymdastyrylyp, Eýropalyq Odaqtyń Qazaqstandaǵy adam quqyqtary boıynsha medıa naýqany aıasynda ótti.
«EO shaǵyn modeli - 2017» oıyny barysynda qatysýshy-stýdentter EO elderi men Qazaqstannyń adam quqyqtary men bostandyqtaryn qorǵaý (densaýlyq saqtaý, bilim berý, mádenıet, sport jáne týrızm salalary) taqyrybynda yntymaqtastyq máselelerin qozǵaıtyn dıplomattardyń rólderin somdady.
Oıynnyń negizgi maqsattary stýdentterdiń saraptamalyq qabiletter, buqara aldynda sóıleı bilý jáne kelissózder júrgize alý daǵdylaryn arttyrý, zertteý júrgizýdiń ádisteri jáne tehnıkasymen tanystyrý, olardyń jalpy oı-óristerin keńeıtý, sondaı-aq adam quqyqtarynyń basty qundylyqtaryn nasıhattaý bolyp tabylady.
İs-shara uıymdastyrýshylary oıyn sońynda barlyq qatysýshylardy túrli syılyqtar men sertıfıkattarmen marapattap, jeńimpazdarǵa arnaıy syılyqtar usyndy.
Qazaqstandaǵy Eýropalyq Odaq ókildiginiń basshysy, elshi Traıan Hrıstea myrza: «EO adam quqyqtaryn nasıhattaýǵa ári qorǵaýǵa umtylady. Biz Qazaqstanmen adam quqyqtary týraly pikirtalastarǵa túrli formatta qatysýdy jalǵastyryp kelemiz. Búgingi stýdenttik oıyn osyndaı pikirtalas alańdarynyń biri bolyp tabylady. Stýdentterdiń búgin kórsetken adam quqyqtary men bostandyqtary boıynsha joǵary bilimderin quptaımyz», - dep atap ótti.
Atalǵan shara Qazaqstandaǵy EO ókildiginiń #EU4HumanRights heshtegi aıasynda uıymdastyratyn adam quqyqtaryna arnalǵan medıa-kampanıasynyń alǵashqy is-sharasy bolyp tabylady.
