Ál-Farabı atyndaǵy Qazaq ulttyq ýnıversıteti Jýrnalısıka fakúltetinde aqyn, pýblısıs, «Aqıqat» jýrnalynyń bas redaktory, M.Maqataev atyndaǵy syılyqtyń jáne halyqaralyq «Alash» ádebı syılyǵynyń ıegeri Amanhan Álimulymen «Búgingi ádebıet jáne jastar» atty kezdesý ótti,-dep habarlaıdy Qamshy.kz aqparat agenttigi.
Aqyn áńgimeniń álqıssasyn jastyq shaǵyn eske alýdan bastady. «Men bala kúnimde kitaphanashy bolýdy armandadym. Kúni boıy kitaphanada otyratynmyn. Óse kele ádebıetshige aınala bastadym. Óleńderim jergilikti basylymdarǵa shyǵyp júrdi. Mektep bitirgen soń, KazGÝ-diń jýrnalısıka fakúltetine qujat tapsyrdym. Biraq túse almadym. Jylda tapsyramyn, jylda túse almaıtyn edim. Óstip alty jyl júrdim. Men emtıhan tapsyrýǵa barǵan saıyn, ondaǵylar «máńgilik abıtýrent» keldi dep qaljyńdaıtyn. Jetinshi ret tapsyrǵanda jýrfakka da tústim-aý áıteýir» dep aqyn ózi oqyǵan bilim shańyraǵynda stýdenttik shaǵyn eske alyp qoıdy.
Stýdentter kezdesý qonaǵynan onyń jýrnalısik qyzmeti men aqyndyq qabileti arasynda qandaı baılanys bar ekenin surady. «Men aqyndyq pen jýrnalısıkany aralastyrǵan emespin. Jýrnalısıka men kórkem dúnıe ekeýi eki nárse. Burynyraq bir jigit maǵan: «Amanhan, seniń óleńderiń mahabbat pen lırıkaǵa toly. Al maqalalaryńda basqalardy janyn shyǵaryp, bas-kózin jaryp aıamaı synaısyń» dep aıtyp edi. Men basylymnyń redaksıasynda jýrnalıspin, redaksıadan shyqqan soń aqynmyn» dedi A.Álimuly kezdesýge jınalǵan stýdentterge.
Bolashaq jýrnalıserdi búgingi ádebıettiń jaǵdaıy qatty tolǵandyrady eken. Olardyń búgingi ádebıetshilerge kóńilińiz tola ma, qazirgi jas aqyndardan kimderdi joǵary baǵalaısyz degen suraǵyna «Búgingi ádebıetke kóńilim tolady. Úzdik shyǵarmalar ómirge kelip jatyr. Jas aqyndar shoǵyry qalyptasyp keledi. Abaı Oraz, Qaırat Seıitqazın syndy jigitterdi joǵary baǵalaımyn» dep jaýap berdi A.Álimuly.
Kezdesý barysynda aqyn stýdentterge óziniń júrekjardy óleńderin oqyp berdi. Syrly jyr shýmaqtaryna rıza bolǵan jastar oǵan álsin-álsin qol shapalaqtap, qoshemet kórsetip otyrdy. Jıyn sońynda A.Álimuly kezdesý kezinde saýatty suraq qoıa bilgen tórt stýdentke óz qalamynan týǵan «Ótkirdiń júzi» kitaptaryn qoltańbasymen syıǵa tartty.
J.Naýryzálıev
