Almatyda Tynyshpaev atyndaǵy Qazaq kólik jáne komýnıkasıalar akademıasynda «Memlekettik til-meniń bolashaǵym» aqparattyq-nasıhattaý sharasy aıasynda, Qazaqstan Respýblıkasynyń Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan qazaq tilin latyn álipbıine birtindep kóshirý jobasyn talqylaý boıynsha «Latyn álipbıiniń búgini men keleshegi» taqyrybynda profesor-oqytýshylarynyń qatysýymen kezdesý ótti, dep habarlaıdy Qamshy.kz aqparat agenttiginiń tilshisi.
Kezdesý barysynda stýdent jastarǵa qazaq qoǵamyndaǵy til saıasatynyń tarıhy, búgingi qazaq tiliniń deńgeıi týraly aqparattar berilip, latyn álipbıine kóshý barysynyń artyqshylyqtary baıandalyp, aýyl sharýashylyǵy mamandyqtaryna latyn álipbıiniń qajettiligi týraly málimetter keltirilip, pikirler aıtyldy.
Stýdentterdiń pikirlerin bilý maqsatynda stýdentterge suraqtar qoıylyp latyn álipbıiniń búgingi jaǵdaıy men bolashaǵyn qalaı elestete alasyz degen taqyryppen erkin mıkrofon sáti uıymdastyryldy.
Aıta keteıik, elimizde latyn grafıkasyna negizdelgen jańa qazaq álipbıi bekitildi. 27 qazan kúni memleket basshysy Nursultan Nazarbaev tıisti jarlyqqa qol qoıǵan.
Budan bir kún buryn memleket basshysy prezıdent ákimshiliginiń basshysy Ádilbek Jaqsybekov pen prezıdent ákimshiligi basshysynyń birinshi orynbasary Marat Tájındi qabyldaǵan kezde latyn qarpine negizdelgen qazaq álipbıiniń sońǵy jobasy qyzý talqylanyp, qoǵam tarapynan qoldaý tapqanyn atap ótken bolatyn.
«Latyn qarpine negizdelgen qazaq álipbıiniń usynylǵan jobasyn bekitý týraly jarlyq shyǵarý qajet. Komısıa jumysyn aıaqtady. Sońǵy nusqa jarıalandy. Ǵalymdar, tiltanýshylar, saıasatkerler, jastar jáne Qazaqstan halqy Assambleıasynyń ókilderi ortaq mámilege keldi. Jalpy, qoǵam qoldap otyr», – dedi memleket basshysy.
Qazaq tiliniń latyn álipbıi jobasy 25 qyrkúıek kúni parlament májilisinde tanystyrylǵan edi. Osyǵan baılanysty paralament tyńdalymy uıymdastyrylyp, oǵan barlyq múddeli taraptar qatysqan bolatyn. Otyrysty ashqan tómengi palata spıkeri Nurlan Nyǵmatýlın latyn álipbıine kóshý máselesinde eshqandaı qatelik bolmaýy kerek ekendigin, biraq ta muny iske asyrý qarqyndy júretinin aıtty. Onyń aıtýynsha, latyn árpine negizdelgen qazaq tiliniń jańa álipbıi birneshe jyl boıyna ázirlengen.
Jańa qazaq álipbıi qazirgi kırıllısadaǵy 42 áriptiń ornyna latyn árpiniń 32 tańbasymen tańbalanatyn bolady.
