Jýyrda Taraz qalasynda respýblıkalyq «Memlekettik til memlekettik qyzmette» atty baıqaý ótti. Memlekettik qyzmette qazaq tiliniń qoldanys aıasyn keńeıtip, memlekettik tildiń mártebesin kóterý maqsatynda uıymdastyrylǵan sharaǵa Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti muryndyq boldy,-dep jazady Qamshy.kz aqparat agenttigi. 

Memlekettik qyzmetshilerdiń qazaq tiline degen oń kózqarasyn qalyptastyryp, qujat tiliniń memlekettik tilge kóshýine, qyzmetterdiń qazaq tilinde kórsetilýine jaǵdaı jasaıtyn baıqaýǵa el aýmaǵynan 13 komanda qatysty. Olar baıqaý shartyna saı 4 kezeń boıynsha bilimderi men biliktilikterin kórsetti.

Aımaqtyq irikteýden ótken komandalarǵa qoǵam qaıratkeri, saıası ǵylymdar doktory Ábdijálel Bákir (tóraǵa), Taraz ınovasıalyq-gýmanıtarlyq ýnıversıtetiniń «Túrkitaný» ǵylymı-zertteý ortalyǵynyń bas mamany, fılologıa ǵylymdarynyń doktory, profesor Qasıet Kakenuly, Qazaq ulttyq salt-dástúrleri akademıasynyń profesory, kompozıtor Kentaý Qýantaıuly, Qazaqstan Respýblıkasy Prezıdentiniń janyndaǵy Memlekettik basqarý akademıasynyń aǵa oqytýshysy Lázzat Pernebekqyzy, Memlekettik tildi damytý ınstıtýtynyń atqarýshy dırektory, fılologıa ǵylymdarynyń kandıdaty Bıjomart Seısenbekuly qazylyq etti.

Saıys qorytyndysy boıynsha Almaty qalasynyń quramasy "Alataý" jeńimpaz atandy. Júldeli 1-oryn Jambyl oblysynyń "Pragmatıkter" komandasyna buıyrdy. Al 2-oryndy QR Din isteri jáne azamattyq qoǵam mınıstrliginiń "Úsh baqytym" komandasy enshilese, 3-oryndy "EKSPO" (Almaty oblysy), "15-shi óńir" (SQO) komandalary ózara bólisti. Jeńimpaz ben júldeger komandalarǵa arnaıy dıplom men qomaqty qarjylaı syılyq tabystaldy.