Halyqaralyq áýe kóligi qaýymdastyǵynyń resmı saıtynda (IATA) Astana qalasy áýejaıynyń ataýy ózgertildi, dep habarlaıdy Qamshy.kz  aqparat agenttigi QR Investısıalar jáne damý mınıstrliginiń azamattyq avıasıa komıtetine silteme jasap.

QR Investısıalar jáne damý mınıstrligi Azamattyq avıasıa komıtetiniń Halyqaralyq áýe kóligi qaýymdastyǵymen (IATA) júrgizgen jumysynyń nátıjesinde Astana qalasy áýejaıynyń jańa ataýy - IATA resmı saıtynda «Nursultan Nazarbayev»  dep kórsetildi. Áýejaıdyń jańa ataýy bıyl 1 qarashadan bastap IATA-nyń aı saıynǵy resmı búlleteninde jarıalanady. Sodan keıin ǵalamdyq áýe bıletterin brondaý júıeleriniń jetkizýshileri (Amadeus, SITA) osy aqparatty keıingi satylymdyq jelilerde de, bıletterde de kórsetý úshin tıisti ózgerister engizýleri tıis.

Osylaısha, aldaǵy ýaqytta áýejaıdyń jańa «Nursultan Nazarbayev» ataýy Astanaǵa baǵyttalǵan jáne Astanadan shyǵatyn jolaýshylardyń áýe bıletterinde kórsetiletin bolady. Sonymen qatar, «TSE» úsh áriptik kodyn ózgertý týraly másele qarastyrylýda.

Aıta keteıik, 2017 jylǵy 20 maýsymda Qazaqstan Respýblıkasy Úkimetiniń № 381 Jarlyǵymen Astana halyqaralyq áýejaıy «Nursultan Nazarbaev halyqaralyq áýejaıy» dep ózgertildi. Halyqaralyq áýe kóligi qaýymdastyǵy, IATA (International Air Transport Assocoation, qysqasha. IATA) halyqaralyq úkimettik emes uıym bolyp tabylady. Bas ofısi Monreal qalasynda (Kanada).

Eýropalyq ortalyq Jeneva qalasynda (Shveısarıa). 2017 jyldyń qazan aıyndaǵy jaǵdaı boıynsha IATA músheliginde 280 áýe kompanıa bolsa, sonyń ishinde. «Eır Astana» kompanıasy da bar.