Almatyda Qazaq kólik jáne komýnıkasıa akademıasynda Elbasymyzdyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda Latyn álipbıine birtindep kóshý máselesine qatysty dóńgelek ústel ótti, dep habarlaıdy Qamshy.kz aqparat agenttiginiń tilshisi.
Elbasymyzdyń «Bolashaqqa baǵdar: rýhanı jańǵyrý» atty baǵdarlamalyq maqalasyn taldaý jáne túsindirý aıasynda, latyn álipbıine birtindep kóshý máselesine qatysty QazKKA májilis zalynda, «Tilder» kafedrasynyń uıymdastyrýmen «Latyn álipbıi» atty dóńgelek ústel bolyp ótti. Dóńgelek ústel qonaqtary retinde, Memlekettik tilderdi damytý ınstıtýtynyń atqarýshy dırektory, f.ǵ.k. B. Qapalbekov, Jazýshylar odaǵynyń múshesi N. Tokmyrza, Almaty menedjment ýnıversıtetiniń dosenti, f.ǵ.k. L. Begalıeva, aǵa oqytýshy G. Baıtileýova shaqyrylsa, óz pikirin aıtýǵa, akademıanyń ardager oqytýshylary: M. Kobdıkov, S. Myrzaly, N. Balqıauly, M. Shalabaev, sonymen qatar akademıa POQ men stýdentter qaýimi kelgen bolatyn.
Kezdesý barysynda, álipbıdi ózgertý kezindegi qorqynyshtar, álipbı bolashaǵy men qurylymy týraly usynystar, talap-tilekter kóptep aıtyldy. Dóńgelek ústel barysynda, bul suraq barlyq áleýmettik toptardy qyzyqtyratyny baıqaldy. Sarapshylar arasynda talqylanyp jatqan jáne latyn álipbıine kóshýdegi «eń tıimdi álipbı jasaý» máselesi akademıada da qyzý talqyǵa tústi. Búginde belgili bolǵandaı, kele jatqan bul úlken ózgeris - Qazaqstannyń aqparattyq keńistikte óz ornyn tabýǵa, básekege qabilettilikti arttyrýǵa jáne qaýipsizdik máselesin kúsheıtýge óz áserin tıgizetini anyq.
Stýdentterdiń atynan óz pikirin bildirgen, VTPO-17-1k tobynyń stýdenti Mendeshkanova Tattigúl: «Bárimiz biletindeı «Elbasymyz 2025 jylǵa deıin» latyn álipbıin qoldanysqa engizý kerektigin aıtty. Búgingi tańda álipbıdi aýystyrýǵa baılanysty túrli pikirler aıtylýda. Bireýler latyn álıpbıiniń ońtaıly tustaryn alǵa tartsa, endi bireýleri asyǵystyq jasamaıyq dep saqtandyrýda. Mundaı pikirlerdiń aıtylýy zańdy qubylys dep oılaımyn. Alaıda, anyq bir másele bar. Ol - qazaq tili búgin be, erteń be mindettti túrde latyn álipbıine kóshedi. Sondyqtan, stýdentter qaýymy osy baǵdarlamany qoldaýǵa árqashanda daıyn», - dep óz oıyn ortaǵa saldy.
Bizdiń damýymyzdyń basty prınsıpteriniń biri – jańa kezeńdegi jańarýǵa ishteı umtylys. Damý úshin ózgerý qajet.
