«QAZAQSTAN» telekorporasıasyna qarasty 14 aımaqtyq telearnalardyń ataýlary ózgerdi. Buryn «Qazaqstan - Pavlodar», «Qazaqstan - Qaraǵandy», «Qazaqstan - Qyzylorda» dep atalyp kelgen óńirlik telearnalar endi «ERTIS», «SARYARQA», «QYZYLORDA» bolyp ózgerdi. 

Bul týraly búgin «QAZAQSTAN» RTRK» AQ Basqarma tóraǵasy Erlan Qarın Ortalyq komýnıkasıalar qyzmetinde ótken baspasóz máslıhatynda málim etti, dep habarlaıdy Qamshy.kz aqparat agenttigi Qazaqparat málimetine súıenip.

«Barlyq arnalardyń logotıpterine ózgeris engizip, ár óńirdiń ózine ǵana tán tabıǵı-geografıalyq ataýlaryn qoldanýdy jón kórdik. Mysaly, buryn «Qazaqstan - Pavlodar», «Qazaqstan - Qaraǵandy», «Qazaqstan - Qyzylorda» jáne t.b bolyp atalsa, endi «ERTIS», «SARYARQA», «QYZYLORDA» bolyp ózgerdi. Jańa maýsym aıasynda aımaqtyq telearnalarda birqatar jańa baǵdarlamalar shyǵa bastady. Stýdıalardyń dızaıny jańaryp, ártúrli jobalardyń sany artty. Jalpy, bul bastama aımaqtardaǵy telearnalarǵa jańa lep, jańa serpilis qana berip qoımaı, qazaq televızıasynyń zamanaýı úrdisterge beıimdelip, ári qaraı damýyna jol ashady» -dedi E.Qarın.

Basqarma tóraǵasynyń aıtýynsha, jańa ataýlar jergilikti zıaly qaýymmen, arna ujymymen uzaq talqylaýdan keıin bekitilgen.

Sondaı-aq, jańa maýsym aıasynda barlyq aımaqtaǵy telearnalarda túrli baǵyttaǵy 96 baǵdarlama shyǵyp úlgerdi. Olardyń qatarynda bilim salasyndaǵy respýblıkalyq, halyqaralyq olımpıadalarǵa qatysyp, jetistikke jetken jastar jaıly «Ertis óńiriniń erenderi», qazaqtyń ulttyq qolónerine arnalǵan «Talǵam men tanym», aýyl men qalanyń tynys-tirshiligin salystyra otyryp, umyt bolyp bara jatqan mal soıý, jilikteý, tabaq tartý, qymyz pisirý sıaqty qazaqy turmysty nasıhattaıtyn «Búk-SHik» jáne ózge de qyzyqty jobalar bar.

 «QAZAQSTAN» óńirlik telearnalarynyń jańa ataýlar tizimi:

1. «Qazaqstan-Qyzylorda» - QYZYLORDA
2. «Qazaqstan-Petropavl» - QYZYLJAR
3. «Qazaqstan-Qaraǵandy» - SARYARQA
4. «Qazaqstan-Aqtóbe» - AQTO`BE
5. «Qazaqstan-Atyraý» - ATYRAY`
6. «Qazaqstan-Oral» - AQJAI`YQ
7. «Qazaqstan-Taraz» - JAMBYL
8. «Qazaqstan-Kókshetaý» - KO`KS`E
9. «Qazaqstan-Pavlodar» - ERTIS
10. «Qazaqstan-Aqtaý» - MAN`G`YSTAY`
11. «Qazaqstan-Óskemen» - ALTAI`
12. «Qazaqstan-Semeı» - SEMEI`
13. «Qazaqstan-Qostanaı» - QOSTANAI`
14. «Qazaqstan-SHymkent» - ON`TU`STIK