Búgin Ortalyq komýnıkasıalar qyzmetinde «QAZAQSTAN» RTRK» AQ-nyń uıymdastyrýymen baspasóz máslıhaty ótti dep habarlaıdy Qamshy.kz aqparat agenttigi.
Shara barysynda «QAZAQSTAN» teleradıokorporasıasy men «SSTV-7» telearnasy ózara áriptestik týraly memorandýmǵa qol qoıdy. Memorandým aıasynda eki jaq birlesip kórkem týyndy túsirý jaıly kelisimge keldi. Bul qazaqstandyq jáne qytaılyq televızıanyń birlese otyryp túsiretin tuńǵysh kınojobasy bolmaq.
Sharanyń maqsaty-televızıa salasynda eki el arasyndaǵy mádenı baılanysty damytý.
Oqıǵa Qazaqtyń memlekettik konservatorıasyn bitirgen, qazaqtyń ónerli jigitteri Aıdar men Parasattyń taǵdyry jaıly. Fılm tutastaı qazaq halqynyń turmys-saltyna, ádep-ǵurpyna, qazaqy qarym-qatynasqa arnalǵan.
Fılm rejıseri Jań Bo-nyń aıtýynsha: «Bul fılm naǵyz mahabbat pen shynaıy dostyq jaıly. Sondaı-aq, keıipkerler arqyly qazaqtyń erteden kele jatqan án-bı ónerin tolyǵymen qamtıdy. Qazaq halqyna degen qurmetimdi osy fılm arqyly jetkizgim keledi. Bul kınojoba Qytaı men Qazaqstan halyqtarynyń dostyǵyn nyǵaıtýmen qatar, kıno óneriniń jarqyn týyndysy bolatynyna senemin»- dedi.
Aıta keteıik, rejıser Jań Bo myrza qazaqtar qonystanǵan Shyńjań ólkesinde dúnıege kelgen, jastaıynan qazaqtyń án-kúıine qanyǵyp ósken azamat. Bolashaq kınotýyndy tek Shyńjań ólkesinde ǵana emes, Astana men Almaty qalalarynda túsiriletin bolady. Akterler men túsirilim oryndaryn tańdaýǵa, óndiristik jáne shyǵarmashylyq jumystardy korporasıa qyzmetkerleri qytaılyq áriptestermen birigip jasaıdy. Sondaı-aq, osy aptada korporasıa basty rólderdi somdaıtyn keıipkerlerge kastıng jarıalady, ázirge 100-den astam ótinish kelip tústi. Fılmge jumsalatyn qarajat qytaılyqtardyń tarapynan bolmaq. Kınojoba qazaqtyń ónerin shetelderde nasıhattap qana qoımaı, mıllıardtaǵan kórermenge jol tartady.
