Astananyń mamandandyrylǵan aýdanaralyq qylmystyq ister soty burynǵy ekonomıka mınıstri, korrýpsıalyq qylmys jasady degen kúdikke ilingen Qýandyq Bıshimbaevtiń isi boıynsha aldyn ala sot tyńdaýyn bastady, dep habarlaıdy Qamshy.kz aqparat agenttigi Azattyq Radıosyna silteme jasap.
Aldyn ala sot tyńdaýy áskerı sot ǵımaratynda ótip jatyr.
Aldyn ala tyńdaý ashyq túrde ótip jatyr. İs boıynsha barlyǵy 23 adam sotqa tartylyp jatyr. Sott sýdıa Ádilhan Shaıhıslamov qarap jatyr.
Para aldy degen kúdikke ilingen Bıshimbaev Astana qalalyq ishki ister departamentiniń ýaqytsha qamaý ızolátorynda otyr. Ol qańtardyń 10-y kúni "top bolyp aldyn ala sóz baılasý arqyly asa iri kólemde birneshe ret para alý faktisi" boıynsha ustalǵan. Eki kúnnen soń ol Astananyń Almaty aýdandyq sotynyń sanksıasy boıynsha qamalyp, sodan beri qamaý merzimi birneshe ret uzartylǵan.
Tergeý málimetinshe, Bıshimbaev "Báıterek" holdıńin basqaryp turǵanynda Qyzylordadaǵy áınek zaýytyn salý kezinde "korrýpsıalyq qıturqylyqtar jasaǵan".
Qazannyń ortasynda jergilikti aqparat agenttigi Korrýpsıaǵa qarsy is-qımyl ulttyq búrosy departamenti dırektorynyń orynbasary Talǵar Serikbaevqa silteme jasap, Qyzylordadaǵy áınek zaýyty qurylysyn salý kezindegi qarjy jymqyrý týraly qylmystyq isti tergeý aıasynda memleketke "1,2 mıllıard teńge kóleminde shyǵyn ótelgenin" habarlaǵan. Al búro Bıshimbaev ózine taǵylǵan aıypty moıyndamaıtynyn jáne "shyǵyndy óteýge aralaspaǵanyn" málimdegen. Biraq keıin Bıshimbaevtiń advokattary búronyń "shyǵyn óteldi" degen málimdemesin teristegen. Advokattar Qyzylorda shyny zaýytynyń qurylysyna bólingen qarajat bank kepilinde bolǵanyn, búro merdiger kompanıalardyń jetekshilerin qamaýǵa alyp, qurylys toqtaǵan soń bank kepil erejesi boıynsha, qurylys qarajatyn qaıtarǵanyn málimdegen.
Bıshimbaev ulttyq ekonomıka mınıstri qyzmetinen 2016 jyldyń jeltoqsanynda korrýpsıaǵa qarsy is-qımyl ulttyq búrosy "Báıterek DEVELOPMENT" ulttyq kompanıasy qatysty tergeý bastaǵan soń bosatylǵan. Kompanıa Bıshimbaev 2013 jyldyń mamyrynan 2016 jyldyń mamyryna deıin basqarǵan "Báıterek" holdıńi quramyna kiredi.
