Qazaqstan men Reseı Qyrǵyzstannan taýar satyp alatyn basty memleketter bolyp qalmaq. Bul týraly 31 qazanda ótken dóńgelek ústelde Qyrǵyzstan Ekonomıka mınıstrliginiń Investısıalardy jáne eksportty yntalandyrý jónindegi memlekettik agenttiktiń dırektory Ádilbek ýýlý Shumqarbek málimdedi, dep habarlaıdy Qamshy.kz aqparat agenttigi.

Sonymen qatar Shumqarbek osy kúnge deıin týyndaǵan máselelerdi sheshý EEQ sheńberinde talqylanýy tıis ekenin aıtty. «Bárin dıalog jolymen sheshý kerek. Búgingi tańda ónimdi satý barysy úlken mańyzǵa ıe. Qazaqstan men Reseı Qyrǵyzstannan taýar eksporttaıtyn eń basty memleketter bolyp qala beredi», - dedi Ádilbek ýýlý Shumqarbek.

Aıta keteıik, 10 qazanda Qazaqstan Qyrǵyzstanmen shekaradaǵy baqylaýdy kúsheıtken. Saldarynan baqylaý-ótkizý pýnkterinde úlken keptelis oryn alǵan. 18 qazanda memleket basshylarynyń Astanada ótkizgen kelissózderi barysynda týyndaǵan qıyndyqtar sheshile bastaǵandaı edi. Alaıda júk kólikteriniń júrgizýshileri áli kúnge deıin shekarany ótýde qıyndyqtarǵa ushyrap jatyr.

Edaily.com portalynyń málimetinshe, eki memlekettiń arasy áli de shıelenisip tur. Astana da, Bishkek te atalmysh qıyndyqtarǵa birin-biri kinálaýmen keledi.