Memleket basshysy Qazaqstanǵa resmı saparmen kelgen Iordanıa Koroli İİ Abdallamen kezdesti, dep habarlaıdy Qamshy.kz aqparat agenttigi.

Qazaqstan Prezıdenti Iordanıa Koroli İİ Abdallamen ekijaqty kezdesýler joǵary deńgeıde ótip jatqanyn atap ótti. 

«Siz dıplomatıalyq qarym-qatynastarymyzdyń 25 jyldyǵy qarsańynda kelip otyrsyz. Osy jyldar ishinde biz senimdi ári dostyq yntymaqtastyq ornattyq. Biz halyqaralyq uıymdar aıasynda bir-birimizge qoldaý kórsetip kelemiz. Iordanıa Qazaqstannyń jahandyq arenadaǵy bastamalaryn qoldap otyr», – dedi Nursultan Nazarbaev.

Memleket basshysy aýyl sharýashylyǵy, farmasevtıka, qorǵanys salalary sıaqty ekonomıkanyń túrli sektoryndaǵy ózara is-qımyldyń nyǵaıyp kele jatqanyn aıtty.

Qazaqstan Prezıdenti Iordanıanyń jáne onyń Koroli İİ Abdallanyń Taıaý Shyǵysta beıbitshilik pen qaýipsizdik ornatýdaǵy rólin erekshe atap ótti.

“Siz ákeńiz Hýseınniń rólin jalǵastyryp, beıbitshilik elshisine aınalyp otyrsyz. Qazaqstan da óz óńirinde osyndaı róldi atqarýǵa tyrysýda. Biz – ıadrolyq qarýǵa qarsy qozǵalys kóshbasshylarynyń birimiz», – dedi Nursultan Nazarbaev.

Memleket basshysy Iordanıa Koroliniń bitimgershilik qyzmetin joǵary baǵalap, oǵan «Iadrolyq qarýsyz álem jáne jahandyq qaýipsizdik úshin» halyqaralyq syılyǵyn tabys etti.

“Bul – Sizdiń eńbegińizge berilgen baǵa. Sonymen qatar, Siz qaqtyǵystar jaǵdaıynda halyqtardy jaqyndatatyn bitimgerlik róldi jalǵastyrady dep senemiz. Sizdiń elińiz Astana prosesine belsendi túrde qatysyp keledi. Iordanıa bir mıllıonnan astam sırıalyq bosqyndy qabyldady, sizder Sırıaǵa qarjylyq jáne gýmanıtarlyq kómek kórsetip otyrsyzdar. Búkil álem osyny baǵalaýǵa tıis dep esepteımin», – dedi Qazaqstan Prezıdenti.

Iordanıa Koroli İİ Abdalla Nursultan Nazarbaevqa Qazaqstanǵa shaqyrǵanyna alǵys aıtyp, tabystalǵan marapat úshin rızashylyq bildirdi.

İİ Abdalla eki el arasyndaǵy qarym-qatynastyń senimge negizdelgenin aıryqsha atap ótip, Qazaqstan Prezıdentiniń halyqaralyq qaqtyǵystardy beıbit jolmen retteýdegi mańyzdy róline toqtaldy.

“Biz Sizdiń álemdi odan ári jaqsartý jáne qaýipsiz etý maqsatyndaǵy rólińizdi óte joǵary baǵalaımyz. Sizdiń kóshbasshylyǵyńyz barshamyz úshin asa mańyzdy», – dedi Iordanıa Koroli.

Sońynda Iordanıa Koroli İİ Abdalla óz halqynyń atynan Nursultan Nazarbaevqa bitimgershilik qyzmeti men kórsetip otyrǵan qoldaýy úshin rızashylyq bildirdi.