Sózdiń marjanyn sazben jetkizetin naǵyz dala ónerpazdaryn anyqtaıtyn «Tekti sózdiń tóresi – terme» baıqaýy máresine jetti,-dep jazady Qamshy.kz aqparat agenttigi.
Qazaqstan Respýblıkasy Mádenıet jáne sport mınıstrliginiń Tilderdi damytý jáne qoǵamdyq-saıası jumys komıtetiniń tapsyrmasymen Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy uıymdastyrǵan dástúrli baıqaý Sátbaev qalasynda ótti.
Respýblıkalyq baıqaýda Astana, Almaty qalalary men 14 aımaqtyń jyr dúldilderi baq synady. Tekti ónerdiń nasıhatshylary baıqaý barysynda el birligi men Alash úshin aıtýly oqıǵa Alashordanyń 100 jyldyǵyn jyrǵa qosty. Ana tildiń taǵdyryn aıtyp, tyńdarmannyń kóńilindegin dóp basty.
Kómeıine bulbul uıalaǵan ónerpazdardyń sheberligin aıtys aqyndary men jyrshy-termeshilerdiń halyqaralyq odaǵynyń tóraǵasy, QR eńbek sińirgen qaıratkeri Júrsin Erman (tóraǵa), Qazaqstannyń halyq aqyny Qonysbaı Ábil, jyrshy, QR eńbek sińirgen qaıratkeri Elmıra Jańabergenova, jyraý, jyrshy Muqash Qojahmetov jáne Mańǵystaý jyrshylyq mektebiniń ókili Amandyq Kómekov baǵalady.
Baıqaý qorytyndysy boıynsha bas júldeni atyraýlyq Gúldana Taıyrova ıemdendi. Al birinshi oryn Shynbolat Dildebaevtyń «Shyńyraýda shyńdalýmen kelemin...» termesin naqyshyna keltirip oryndaǵan Aınur Qonysbaevaǵa buıyrdy. Júldeli ekinshi oryndy Syr mektebiniń túlegi Marat Súgirbaı enshilese, úshinshi oryndy Mańǵystaýdyń marǵasqasy Temirbek Asqambaev pen pavlodarlyq Talǵat Blankın ózara bólisti.
Baıqaý júldegerleri men jeńimpazdaryna arnaıy dıplom men qomaqty qarjylaı syılyq tabystaldy. Al barlyq qatysýshylarǵa uıymdastyrýshylar tarapynan alǵysqattar usynyldy.
