Tashkentte ótip jatqan TMD elderi úkimet basshylarynyń kezdesýinde Qyrǵyzstan premer-mınıstri Sapar Isakov qazaq-qyrǵyz shekarasyndaǵy jaǵdaıdy másele qylyp kóterdi. Aqparattarǵa qaraǵanda, bul másele jıynnyń kún tártibinde bolmaǵan,-dep Qamshy.kz aqparat agenttigi Azattyqqa silteme bere otyryp jazady.
Resmı BAQ-tyń habarlaýynsha, Sapar Isakov Qazaqstan TMD-nyń erkin saýda aımaǵyn qurý týraly kelisiminiń talaptaryn «tolyq oryndamaı otyrǵanyn» málimdedi. Al Baqytjan Saǵyntaev Qyrǵyzstandy Eýrazıa ekonomıkalyq odaǵy (EAEO) aıasynda ózine alǵan mindetterin «tolyq oryndaýǵa» shaqyrdy.
Isakovtyń sózinshe, Qazaqstan 10 qazannan bastap shekarada taýar men kólik qozǵalysynyń erkin ótýine «qoldan kedergi jasap otyr». «Kólikter bes kúnge deıin tekserýden ótedi. Ár kezde ár túrli sebep aıtady, Qyrǵyzstan kontrabanda tasymaldap jatyr degenge deıin bardy. Aýyl sharýashylyǵy, sút ónimderin kontrabanda deýge bola ma?» dedi Isakov. Onyń sózinshe, budan Qyrǵyzstan men Qazaqstannyń jáne úshinshi eldiń kásipkerleri shyǵynǵa batyp otyr.
«Qoldanylyp jatqan sharalar halyqaralyq quqyq normalaryna qaıshy keledi. 20 kúnnen astam ýaqyttan beri jaǵdaı jaqsarmaı tur, bul Qyrǵyzstandy EAEO men Dúnıejúzilik saýda uıymyna júginýge májbúrlep otyr» degen Saǵyntaev Qazaqstan qoldanyp otyrǵan sharalar «ýaqytsha bolatyn shyǵar» degen úmitin bildirgen.
Baqytjan Saǵyntaev buǵan jaýabynda úkimet qyrǵyz tarapynyń pikirin durys kórmeıtinin málimdedi. Saǵyntaevtyń sózinshe, Qazaqstannyń bul másele boıynsha ustanymy «EAEO elderiniń ortaq ekonomıkalyq keńistigin qurý ıdeologıasyna tolyq saı keledi» jáne odaq elderi úshin ekonomıkalyq qaýip-qaterlerdi azaıtýdy maqsat tutady.
25 qazanda Erevanda ótken EAEO elderi úkimet basshylarynyń kezdesýinde Saǵyntaev Qyrǵyzstan men Qytaı arasyndaǵy taýar aınalymy týraly málimetter arasynda «kádimgideı aıyrmashylyq» baryn málimdep, Qyrǵyzstanmen shekaradaǵy tekserýdiń kúsheıtilý sebebin «kontrabandamen kúres» dep túsindirgen. Bishkektiń uıǵarymynsha, mundaı problema EAEO elderiniń barlyǵynda bar.
7 qazanda Qyrǵyzstan prezıdenti Almazbek Atambaev prezıdenttikke keıbir kandıdattar men Qazaqstan bıliginiń atyna qatar syn aıtqan. Osydan kóp uzamaı, 10 qazanda Qazaqstan Qyrǵyzstanmen shekarada tekserýdi kúsheıtip, shekaranyń qyrǵyz jaǵynda júk kólikteriniń kezegi paıda bolǵan. Taraptar 19 qazannan bastap jolaýshylar kóligi men júgi bar jolaýshylardy ótkizýdi jeńildetýge kelisken bolatyn. Biraq úlken júk kólikteri shekaradan óterde áli de jiti tekserilip, sonyń saldarynan kezek azaımaı tur.
