Kóne soqpaly aspaptardyń áserli sazdy úni men ǵajaıyp akrobattyq qoıylymdar. Qazaq memlekettik qyzdar pedagogıkalyq ýnıversıtetinde káris mádenıetinen syr shertetin konsert ótti. Bul týraly oqý ornynyń Medıa ortalyǵy habarlady.

«Almaty áýenderi» konserttik birlestigi men Koreı ulttyq mádenıetin saqtaý qorynyń uıymdastyrýymen usynylǵan kesh «Koreı ulttyq mýzykasyn qazaqstandyqtarǵa tanystyrý» jobasy aıasynda uıymdastyrylyp otyr. Maqsat - dástúrli halyq án-bıleri men zamanaýı ónerdi nasıhattaý arqyly eki el arasyndaǵy ózara yntymaqtastyqty nyǵaıtý.

Ońtústikkoreıalyq «Pılbong» ansambli óz repertýaryndaǵy ulttyq ánder men bılerdi oryndap, ónerlerin ortaǵa saldy. Shyǵarmashylyq toptyń jetekshisi, ál-Farabı atyndaǵy Qazaq Ulttyq ýnıversıtetiniń profesory Chan Peng Sýn ansambldiń shyǵý tarıhyna toqtalyp, kórermenderdiń saýaldaryna jaýap berdi.

«Óner ujymynyń irtetasy osydan 3 ǵasyr buryn qalyptasqan. Bastapqyda egin basyndaǵy sharýalardyń ánderin mýzykalyq aspaptarǵa qosyp jurtshylyqqa tanylǵan. Ýaqyt óte kele úlken sahnalarǵa shyǵyp, ónerin pash ete bildi. Qazaqstanda jyl saıyn Koreıa eliniń mádenıetiniń qurmetine arnalǵan aýqymdy merekelik sharalar ótip turady. Búgingi kesh te sonyń jalǵasy ispettes. Qos memlekettiń ónerin sabaqtastyrǵan mádenı shara aldaǵy ýaqytta da dástúrge aınalatynyna senimdimiz», - dedi Chan Peng Sýn.

Shara sońynda Qyzdar ýnıversıtetiniń Óner jáne mádenıet fakúltetiniń dekany Gúlnur Ómirbaeva ansámbl múshelerine oqý orny ujymynyń atynan alǵysyn bildirip, syı-sıapat kórsetti.