Batys Qazaqstan oblysynda analarǵa arnalǵan mýzeı ashylmaq. Onda elge eńbegi sińgen, otbasyndaǵy tálim-tárbıesimen úlgi ónege bolyp júrgen jáne kóp balaly analar dáripteletin bolady.

Taıaýda ótken oblystyq assambleıanyń keńeıtilgen otyrysynda J. Dosmuhamedov atyndaǵy pedkolledjdiń dırektory, BQO QHA janyndaǵy analar keńesiniń tóraıymy Shalqyma Qurmanalına mýzeı ashý jóninde usynys aıtqan bolatyn. «Otbasynyń tiregi bul – ana.   Eger ana durys bolmasa, ol otbasy músheleriniń keleńsiz jaǵdaıǵa túsetinin ómirdiń ózi kórsetip otyr. Anany qurmetteý barshamyzǵa mindet. Dana anadan daryndy bala dúnıege keledi. Urpaqtyń ulaǵatty bolýy otbasynda áke men anaǵa baılanysty. Oblysymyzda túrli salada jemisti eńbek etken, januıasyna uıytqy bolyp júrgen úlgili analar az emes. Eger mýzeı ashylsa, osyndaı analardy dáripteýdi maqsat tutyp otyrmyz. Jalpy, onda óńirimizden shyqqan tanymal áıelder týraly málimetterdi, qujattardy, sýretterdi, turmystyq zattardy da qoıý oıda bar», - dedi Shalqyma Haırollaqyzy.

Atalmysh jıynǵa qatysqan Qazaqstan halqy assambleıasy tóraǵasynyń orynbasary Darhan Myńbaı bul usynysty qoldady.

• Mundaı mýzeı Almaty oblysynda bar. «Anaǵa qurmet» dep atalatyn mádenı nysanda jaqynda Elbasymyz boldy. Onda elimizdiń dańqty analaryna arnalǵan túrli qujat, kitap sekildi qundy zattardyń bári jınaqtalǵan. Qazirgi tańda bul - Jetisý óńirindegi adam kóp baratyn tanymal oryndardyń biri. Ol jaqta bolyp jatsańyzdar ýaqyt taýyp, bul mýzeıge kirip shyǵýǵa keńes berer edim. Jalpy, analarǵa arnalǵan mýzeıdi tek oblys ortalyǵynda emes, aýdandarda da ashsa, artyq etpeıdi. Sebebi bul mádenı oryndar otbasy qundylyǵyn nyǵaıtýǵa da atsalysady. Eger januıada tatýlyq bolsa, onda memleketimizdiń birligi nyǵaıyp, yntymaǵy arta túseri anyq,- dedi ol.

Gúlim AQAP,

Batys Qazaqstan oblysy