Almaty qalasy Qoǵamdyq keńesiniń osy kúnge deıingi qyzmeti men tájirıbesi týraly «Bolashaq» respýblıkalyq qozǵalysynyń jáne «Jastar úni» jastar qoǵamdyq birlestiginiń tóraǵasy, sondaı-aq atalǵan keńestiń  múshesi Dáýren Babamuratov baıandap berdi.

«Qoǵamdyq keńes óz qyzmetin turaqty jáne júıeli negizde júzege asyrady. Negizgi ereksheligi - ákimshilikten tys jerde ornalasýy. Bul óte mańyzdy. Biz o bastan onda otyrmaımyz degen sheshim qabyldadyq. Sebebi, halyqta «ákimshilik ǵımaratynyń ishinde otyrsa, ol ákimniń, memlekettik organdardyń qaramaǵynda bolady, bul ákimniń qoǵamdyq keńesi» degen jansaq pikir qalyptasqan. Shyn máninde, qoǵamdyq keńes ákimniń nemese memlekettik organ basshysynyń qaramaǵyndaǵy emes, táýelsiz keńes», - deıdi Dáýren Babamuratov.

Onyń sózinshe, keńestiń taǵy bir ereksheligi - «Almaty keńesi» degen resmı saıty bar. Keńestiń qyzmeti, talqylaýdaǵy máseleler, usynystary sol jerde jarıalanady. 2016 jyldan bastap atqarylǵan jumystardy jurt saıttan kóre alady.

«Óz tarapymnan birshama dúnıege toqtalsam degen oıym bar. Birinshi másele - saıt máselesi. Meniń oıymsha árbir qoǵamdyq keńestiń mindetti túrde  aqparattyq ortalyǵy, ıaǵnı saıty bolýy kerek. Ókinishke oraı, barlyq jerde mundaı emes. Árıne, bul qosymsha qarajat, qosymsha adamnyń qyzmetin talap etetin shyǵar. Biraq, aqparattyq saıttyń bolýy, meniń oıymsha, zaman talaby. Sebebi, kúndelikti turaqty túrde atqarylyp otyrǵan jumysqa qatysty aqparatty alý úshin halyqqa ortalyq kerek, bir júıe kerek. Sonymen qatar, bul jerde keńestiń muraǵaty qalyptasady. Bul, sózsiz, qoǵamdyq keńestiń qyzmetin jetildiredi dep oılaımyn», - deıdi ol.

Keńes múshesi mundaı keńester áleýmettik jelilerge de kóńil bólý kerek ekenin aıtady.

«Biz aqparattyq qoǵamda, tehnologıalar damyǵan zamanda ómir súrip jatyrmyz. Keńesterdiń jumysyn da osyǵan beıimdeý kerek. Bizdiń Facebook áleýmettik jelisinde óz paraqshamyz bar. Bul paraqshada qoǵamdyq keńesterge, jınalystarǵa, otyrystarǵa, tyńdaýlarǵa, daýly suraqtarǵa, ózekti máselerge qatysty  aqparattyń barlyǵy tolyq túrde jarıalanyp otyrady. Mysaly, 2016 jylǵy qyzmetimizdiń qysqasha esebin 5000-nan astam adam qarap, habardar bolǵan. Bul jaqsy nátıje jáne aqparatqa qoljetimdilik pen ashyqtyqtyń aıqyn kórinisi. Sondyqtan qoǵamdyq keńesterde áleýmettik jelide paraqshalary bolyp, sol jerde tolyq aqparatty berip otyratyn bolsa, sózsiz jumystyń tıimdiligin arttyrar edi», - deıdi Keńes múshesi.

Odan bólek, spıker qoǵamdyq keńester azamattardyń quqyqtary, bostandyǵy men mindetterine qatysty normatıvtik-quqyqtyq aktilerdi qarastyryp, usynystar beretinin aıtady: «Osy másele qazirgi ýaqytta talqylanyp jatyr. Oǵan baılanysty san-alýan pikirler aıtyldy. Keıbireýleri osy tarmaqty zańnan alyp tastaý kerek, keıbireýleri ózgerister engizý kerek dep esepteıdi. Meniń oıymsha, eger biz zań aktilerin qaraıtyn pýnkti alyp tastaıtyn bolsaq, onda qoǵamdyq keńes tek qana usynys beretin organ bolyp qalady. Kóptegen jıyndardan eshqandaı aıyrmashylyǵy bolmaıdy. Meniń oıymsha, bul fýnksıa keńesterdiń quzyrynda qalý kerek, ol qoǵamdyq keńester úshin asa mańyzdy».

Sóz sońynda Dáýren Babamuratov Qoǵamdyq keńesterdiń halyq pen bılik arasyn dánekerleýshi, bılik pen qoǵamdy baılanystyrýshy qurylym ekenine toqtaldy.

«Elbasymyz N.Á. Nazarbaev: «Bılik oń jaqta, halyq sol jaqta, ekeýiniń arasy alshaqtap ketti, ortasyn dánekerleıtin quzyrly organdar qajet, ortasyn dánekerleıtin azamattar kerek, qurylymdar kerek» dep atap kórsetken. Qoǵamdyq keńes - dánekerleýshi, bılik pen qoǵamdy baılanystyrýshy qurylym. Onyń quzyryn odan ári arttyrý úshin quramynyń sapasyn arttyrý qajet. Ol úshin belgili bir deńgeıde balama ádisteme joldaryn qarastyrý qajet. Keńes quramynyń sapasy artqan saıyn, qyzmetiniń tıimdiligi de arta túsedi dep esepteımin», - dedi ol.