Senbi kúni Oral shaharyndaǵy Táýelsizdik alańynda "Dástúr" atty mádenı- kópshilik shara ótti. QR Prezıdenti Nursultan Nazarbaevtyń "Bolashaqqa baǵdar: rýhanı jańǵyrý" atty maqalasynda "Yqylym zamannan arqaýy úzilmegen ulttyq salt-dástúrimizdi aldaǵy órkendeýdiń berik dińi etip alyp, bolashaqqa senimmen bet alyp, alǵa nyq qadam basý" qajettigi týraly aıtqan bolatyn. Osy joba aıasynda jas urpaqtyń sanasyna patrıottyq sezim uıalatyp, ulttyq salt-dástúrimizdi ulyqtaý maqsatynda uıymdastyrylǵan sharaǵa halyq kóp jınaldy. Mádenı sharaǵa oblys ákiminiń birinshi orynbasary Arman Óteǵulov arnaıy keldi.
- Búgingi shara - Elbasymyzdyń "Rýhanı jańǵyrý: bolashaqqa baǵdar" baǵdarlamasynyń aıasynda ótip jatqan etnostyq sharalardyń biri. Ata-babamyzdan mura bolǵan ıgi dástúrimizdi jastardyń sanasyna sińirýdi maqsat tutady. Ósip kele jatqan jas urpaq ulttyq qundylyqtarymyz ben salt-dástúrimizdi zaman talabyna saı qoldanyp, urpaqtan-urpaqqa jetkizse deımiz, -dep sózin sabaqtaǵan Arman Kárimuly ulttyq qundylyqtarymyzdy nasıhattaıtyn mundaı merekeniń aldaǵy ýaqytta da turaqty túrde ótip turatynyna senim bildirdi.
Án men jyr tógilip, ulttyq salt-dástúrimiz kórinis tapqan sharada óńirimizdiń orta, joǵary oqý oryndarynyń stýdentteri men oqytýshylary belsendilik tanytty. Táýelsizdik alańynda ár aýdan men Oral qalasynyń turǵyndary aq shańqan kıiz úı tigip, ulttyq salt-dástúr boıynsha kórinis kórsetip, kelgen qonaqtarǵa qazaqtyń ádet-ǵurypmen qonaqjaılylyq tanytty. Merekede ulttyq qolóner kórmesi uıymdastyrylyp, ulttyq oıyndar oınaldy. Qadyr Myrza Álı eskertkishiniń mańynda Aq Jaıyqtyń aq shaǵalasy atanǵan Aqushtap Baqtygereeva bastaǵan óńirimizdiń aqyn-jazýshylary jastarmen júzdesip, taǵylymdy áńgimeler aıtty.
Ulttyq ádet-ǵuryp, salt-dástúrimizdi jurtshylyq nazaryna usynǵan jarasty shara qalalyq, oblystyq óner ujymdarynyń konsertine ulasty.
Gúljamal JOLDYǴALI
