Jýyrda Oral shaharyndaǵy «Sıtı sentr» ortalyǵynyń tórtinshi qabatynda «Aıalaǵan alaqan» qoǵamdyq qorynyń uıymdastyrýymen «Ómir súr, sábı!» atty aksıa ótti. Aksıa sheńberinde eriktiler toby shala týǵan jáne anasy bas tartqan sábılerge júnnen qolǵap, shulyq, keýdesheler toqydy.
«Aıalaǵan alaqan» qoǵamdyq qorynyń jetekshisi Rada Haırýshevanyń aıtýynsha, aksıaǵa qala turǵyndary men qonaqtary belsendi túrde qatysqan.
- Biri toqyma jibin ákelip, endi biri sábıge arnalǵan kıimder men oıynshyqtar ákelip jatty. Eriktiler toby úsh saǵattyń ishinde sábılerge arnalǵan birneshe shulyqtar, bas kıim, keýdesheler toqydy. Bul toqyma buıymdar ásirese, shala týylǵan bóbekterdiń damýyna óte paıdaly. Óıtkeni burynǵy kezde ata-ájelerimiz shala týylǵan náresteni tymaqtyń ishine salyp, kózge eleýsizdeý turǵan esiktiń jaqtaýyna ilip qoıatyn bolǵan eken. , - deıdi ol.
«Ómir súr, sábı!» aksıasyna shamamen 100-ge jýyq adam qatysty. Aıaly alaqandardyń jylýy sińgen sábıge arnalǵan zattar keıinnen perınataldy ortalyq pen bóbekter úıindegi sábılerge tabystalmaq.
- Qalamyzda qaıyrymdy jandar óte kóp. Sábılerdi qorǵaý baǵytyndaǵy usynystarymyzdy qabyl alǵan Rýslan Ǵabdýllın, Dennıs Volodınǵa, «Sıtı sentrdiń» Play, Happy kids, Daniel býtıkteriniń ıelerine jáne ylǵı ózgelerge kómek kórsetýge daıyn turatyn bizdiń komandaǵa aıtar alǵysymyz sheksiz. Sonymen qatar «Bóbekter úıinde» 24 sábıdiń óz ata-anasyn kútip júrgenin qaıyrymdy jandardyń qaperine salǵym keledi. Bizdiń qalamyzda júregi meıirimge toly kásipkerler, qolyndaǵysyn qınalǵan janǵa bólip bergisi kelip turatyn qarapaıym adamdar, qoǵamdaǵy túıtkildi máselege sergek qaraıtyn qoǵamdyq birlestikter az emes. Meni osyndaı meıirimdi jandardyń kóp bolǵany qýantady, - deıdi Rada Haırýsheva.
«Aıalaǵan alaqan» qoǵamdyq qory birneshe márte múmkindigi shekteýli balǵyndarǵa arnap konsert bergen bolatyn.
Gúlim AQAP,
Batys Qazaqstan oblysy
