Jýyrda Batys Qazaqstan oblysyndaǵy H.Bókeeva atyndaǵy oblystyq qazaq drama teatrynda qaıyrymdylyq aılyǵy aıasynda «Batys Qazaqstan oblysy múgedekteri erikti qoǵamy» qoǵamdyq birlestiginiń uıymdastyrýymen múmkindigi shekteýli jandardyń XX oblystyq shyǵarmashylyq festıvali ótti.
Múmkindigi shekteýli jandarǵa shyǵarmashylyq áleýetin damytýǵa jáne óz ónerin kórsetýge járdemdesý, olardyń qoǵamǵa etene aralasýyna, tájirıbe almasýyna jaǵdaı jasaý maqsatynda uıymdastyrylǵan oblystyq festıválǵa aýdandyq jáne qalalyq kezeńderdiń jeńimpazdary qatysty. Taǵdyr synyna moıymaǵan qaısar jandar estradalyq vokal, kórkem sóz oqý jáne kórme jumysy atalymdary boıynsha synǵa tústi.
Saltanatty sharanyń ashylýynda sóz alǵan oblys ákiminiń orynbasary Ǵabıdolla Ospanqulov múmkindigi shekteýli jandarǵa ózderin qoǵamnyń tolyqqandy múshesi retinde sezinýine jaǵdaı jasaıtyn osyndaı sharalardyń mańyzy zor ekenin aıtty.
Memleket Konstıtýsıaǵa saı áleýmet pen áleýmettik salaǵa bıznes ókilderi, úkimettik emes uıymdar tarapynan kóptep kóńil bólip keledi. Bizdiń oblysta on áleýmettik joba usynylsa, jalpy quny tórt mln teńge quraıtyn eki joba naqty qoldaý tapty, - deı kele Ǵabıdolla Abdollauly qolóner sheberleriniń jumysyna joǵary baǵa berdi.
-Jyl sanap baıqaýdyń aýqymy keńeıip keledi. Jalpy óńirimizde 800-den astam múmkindigi shekteýli adam shyǵarmashylyqpen aınalysady. Qaıyrymdylyq aılyǵymen oraılasqan shyǵarmashylyq festıvali bıyl da talantty jandardyń talabyn ushtap, ómirge degen qulshynysyn arttyrýǵa járdemdesti dep senemin, -deıdi «BQO múgedekteri erikti qoǵamynyń» tóraǵasy Jumajan Qojjanov.
Baıqaý qorytyndysy boıynsha «Estradalyq vokal» atalymynda Oral qalasynyń turǵyny Erlan Ábdrahmanov úzdik oryndaýshy atandy. «Kórkem sóz oqý» atalymy boıynsha qaratóbelik Aınara Sarbasova bas júldege ıe boldy. Sonymen qatar Zelenov aýdanynan kelgen Mıhaıl Starınestiń qolóner týyndylary «Kórme jumysy» atalymynda úzdik dep tanyldy. Barlyq qatysýshylar alǵys hatpen marapattalsa, baıqaý jeńimpazdaryna dıplom men baǵaly syılyqtar tabystaldy.
Gúlim AQAP,
Batys Qazaqstan oblysy
