Hadısha Bókeeva atyndaǵy Batys Qazaqstan oblystyq qazaq drama teatrynda «Óner shamshyraǵy» atty otbasylyq ansámblder baıqaýy ótti.

Elbasynyń «Bolashaqqa baǵdar: rýhanı jańǵyrý» baǵdarlamasy aıasynda otbasy mártebesin arttyryp, olarǵa qoldaý kórsetý, halqymyzdyń dástúrli ónerin damytý maqsatynda BQO mádenıet, muraǵattar jáne qujattama basqarmasynyń qoldaýymen oblystyq halyq shyǵarmashylyǵy ortalyǵy uıymdastyrǵan óner saıysyna 10 otbasylyq ansámbl qatysyp, baqtaryn synady. Baıqaý barysynda otbasylyq ansámblder músheleri ózderin ár qyrynan tanytty, ıaǵnı biri qazaqtyń qasıetti qara dombyrasymen sahnaǵa shyqsa, ekinshisi estradalyq janr, baıandy qolǵa aldy. Úshinshisi ónerin bımen órip, kópshilik qoshemetine bólendi. Óner dodasyna óńirge tanymal ánshi-termeshi, QR halyq aǵartý isiniń úzdigi, «Eren eńbegi úshin» medaliniń ıegeri, halyqtyq Qabıevter otbasylyq ansambli jáne «Qyz Jibek» termeshiler ansambliniń jetekshisi Baıan Qabıeva bastaǵan qazylar tórelik etti. Elimizde «Rýhanı jańǵyrý» baǵdarlamasyna sáıkes kóptegen jobalar qolǵa alynýda. Sonyń ishinde dástúrli ónerimizdi damytýǵa mol múmkindik týyp otyr. Osy oraıda ózindik qoltańbasy bar otbasylyq ansámblderdiń qatary kóbeıe berse, nur ústine nur bolar edi», dedi B.Qabıeva.

Saıys qorytyndysynda  qazaq ónerin joǵaltpaı, ulttyq ónerdi atadan balaǵa mıras etip kele jatqan otbasylyq ansámbldiń eń júırikteri anyqtalyp, olar gala-konsertte sahnaǵa shyqty. Atap aıtqanda, Jánibek aýdanynan kelgen Kárimovter otbasylyq ansambli bas júldeni jeńip alsa, Hasanovtar (Qaztalov) birinshi, Sısenovter (Zelenov) men Baıtemirovter (Qaratóbe) ekinshi, Qabıevter (Terekti), Baıǵalıevter (Shyńǵyrlaý) jáne Botashevtar (Bórli) úshinshi orynǵa ıe boldy. Olardyń bári de dıplomdarmen, alǵysqattarmen, syılyqtarmen marapattaldy.

Gúlim AQAP,

Batys Qazaqstan oblysy