Jýyrda Hadısha Bókeeva atyndaǵy Batys Qazaqstan  oblystyq qazaq drama teatrynda «Ata sózi – bata sóz» atty oblystyq batagóı qarıalar baıqaýy ótti.

Batagóıler baıqaýyna Oral qalasy men aýdandardan 63-75 jas aralyǵyndaǵy 15 qarıa kelgen. Olar – túrli mamandyq ıeleri. Basym kópshiligi ulttyq kıimmen sahnaǵa shyqty. Baıqaý úsh kezeń boıynsha ozdyryldy. Sharanyń aldynda batanyń máni men mańyzy týraly tolǵaý aıtylyp, abyz aqsaqal beınesindegi akter jamaǵatqa bata berdi. Oblystyq soǵys jáne eńbek ardagerleri keńesiniń tóraǵasy Myrzaǵalı Muhambetov quttyqtaý sóz sóılep, batagóı aqsaqaldardyń jastar tárbıesine oń yqpalyn da aıryqsha atap ótti. Baıqaýdyń alǵashqy satysynda qarıalar sózden múdirmesten aty-jónin, tegin sýdyrata aıtyp, ózderin tanystyrdy. Arasynda óleńge de jol berip, dombyrasyn kúmbirletkender de kezdesti. Ekinshi bólimde de oza shaýyp, aıryqsha bilimdarlyq tanytqandar az bolǵan joq. Sonyń ishinde aqjaıyqtyq Syılyhan Zeınetov Qarasaı batyrdyń batasyn aıtqany óz aldyna, onyń ómir joly jáne erlik isteri týraly da keńinen baıandady. Batagóı aqsaqaldardyń ishinde eń sándi de kózge túserlikteı kıingen bórlilik Esenǵul Kóshekbaevtyń ónegesi aıtýǵa laıyq. Oral qalasynyń atynan shyqqan úsh aqsaqaldyń ekeýi Bákar Oraqaev, Serik Qarabalınder – Jánibek aýdanynyń týmalary. Ekeýi de tym táýir óner kórsetip, Baýyrjan Momyshulynyń, Kenen Ázirbaevtyń batalaryn áserli oryndady. Shyńǵyrlaýlyq aqsaqal, qajy Temirǵalı Jantasovtyń da sóz saptaýy ońtaıly shyqty. Burynǵy feldsher, bókeıordalyq Seıtemáli Qýanshálıevtiń basqalarmen salystyrǵanda, óneri sál kemshin tússe de, kórermen qaýym oǵan da rızalyqpen qol soqty. Biraq qashanda «Júzden júırik ozady jarysqanda» degen támsil bar. Kórermender batagóı qarıalardyń ónerin qyzyqtaı otyryp, úsh saǵatqa jýyq ýaqyttyń qalaı ótkenin sezbeı de qaldy. Sonymen ádilqazylar alqasynyń uıǵarýymen bas júlde Batys Qazaqstan oblysynyń Tasqala aýdanynyń turǵyny Jumageldi Úmbetálıevke usynyldy. Al birinshi oryndy qaratóbelik Ertaı Serdálın ıelense, ekinshi oryndy zelenovtyq Satybaldy Tólegenov, jańaqalalyq Amanjan Salaýatovtar qanjyǵasyna baılady. Úshinshi oryn Temirǵalı Jantasov (Shyńǵyrlaý), Syılyhan Zeınetov(Aqjaıyq), Ismaǵul Mýsınderdiń (Qaztalov) enshisine tıdi. Qalǵan qatysýshylar oblystyq mádenıet, arhıvter jáne qujattama basqarmasynyń alǵysqattary jáne dıplomdarymen marapattaldy.

Gúlim AQAP,

Batys Qazaqstan oblysy