Búgin prezıdent Nazarbaev Reseıge issaparmen barǵanyn habarlaǵan bolatynbyz. Chelábınskte Reseı jáne Qazaqstan eli basshylarynyń qatysýymen ótip jatqan XIV óńiraralyq yntymaqtastyq forýmyna Batys Qazaqstan oblysynyń ákimi A.Kólginov te qatysýda.
2003 jyldan beri dástúrli túrde uıymdastyrylyp kele jatqan forýmnyń maqsaty – eki eldiń arasyndaǵy túrli saladaǵy yntymaqtastyqty bekitip, saýda-ekonomıkalyq, ǵylymı-tehnıkalyq jáne mádenı baılanystardy nyǵaıtý.
Geografıalyq ornalasýy men tarıhy jaǵynan baılanysy tereńde eki memlekettiń arasyndaǵy saýda-ekonomıkalyq qarym-qatynastar óte tyǵyz. Máselen, Reseı eliniń 5 birdeı oblysymen shektesetin Batys Qazaqstan oblysynyń ózinde Reseı bıznes ókilderiniń qatysýymen 160-tan asa kásipkerlik sýektileri jumys jasaıdy. Sondaı-aq sońǵy 3 jyldyń ishinde tek Batys Qazaqstan oblysynyń Eýrazıalyq ekonomıkalyq Odaqpen aradaǵy taýar aınalymy 2 mldr. AQSH dollaryn qurasa, bıyldyń ózinde Reseı elimen 400 mln. dollardy qurap, 40 paıyz ósimdi kórsetip otyr.
Forým aıasynda Qazaqstan men Reseı Federasıasy oblystarynyń arasynda arnaıy kelisimder jasaldy. Sonyń ishinde Penza oblysynyń Úkimeti men Batys Qazaqstan oblysynyń ákimdigi ekonomıkalyq, ǵylymı-tehnıkalyq jáne mádenı yntymaqtastyq týraly kelisimge qol qoıdy.
Óz kezeginde óńiraralyq forýmnyń eki el úshin de asa tıimdiligin atap ótken oblys ákimi A.Kólginov:
- Biz úshin Penza oblysynyń İT tehnologıa, medısına, farmasevtıka, aýyl sharýashylyǵy salasynda júzege asyryp jatqan jobalary óte qyzyqty. Óıtkeni Batys Qazaqstan oblysynda da mashına jasaý, aýyl sharýashylyǵy baǵyty jaqsy jolǵa qoıylǵan. Sondyqtan búgin biz jasasqan kelisimniń aýqymy keń, kóp salany qamtıdy. Qazirdiń ózinde eki oblystyń ókilderi bir-birimizge baryp, tájirıbe almasý jóninde ýaǵdalastyq. Jalpy, mundaı sharalar jaqyndastyra túsedi dep oılaımyn. Mysaly byltyr Astana qalasynda eki memleket basshysy N.Nazarbaev pen V.Pýtınniń qatysýymen ótken forýmda Batys Qazaqstan oblysyna qatysty eki qujatqa qol qoıylǵan bolatyn. Onyń biri júrdek poıyzdardy iske qosý jáne eki el shekarasyndaǵy tekseristerdi alyp tastaý bolsa, ekinshisi Jaıyq ózenine qatysty. Búginde júrdek poıyzdar arqyly qatynaý turǵyndarǵa óte qolaıly. Bir sózben, halyq osyndaı kelisimder negizinde júzege asatyn sharalardyń nátıjesin kórýde, - dedi.
Forým taqyryby «Adam kapıtalyna ınovasıalar engizý» bolǵandyqtan, munda eki memlekettiń oqý oryndary men ǵylymı ortalyqtarynyń arasyndaǵy baılanys máselesi de talqylandy. Qazirdiń ózinde Batys Qazaqsan oblysynyń birneshe oqý oryndary men Reseı oqý oryndarynyń arasyndaǵy baılanys tyǵyz. Stýdenttermen akademıalyq almasý, ǵalym-ustazdardyń tájirıbe bólisýi maqsatyndaǵy sharalar kóptep júzege asýda. Sonyń ishinde M.Ótemisov atyndaǵy Batys Qazaqstan memlekettik ýnıversıtetiniń ujymy men Penza memlekettik ýnıversıtetiniń arasynda arnaıy kelisim jasalǵan.
Atap ótkenimizdeı, óńiraralyq baılanysty nyǵaıtýdy kózdeıtin bul sharaǵa eki memlekettiń basshysy qatysýda. Forým qorytyndysynda Qazaqstan men Reseı arasyndaǵy dıplomatıalyq qarym-qatynastardyń ornaǵanyna 25 jyl tolýyna oraı N.Nazarbaev pen V.Pýtın kelisimderge qol qoıady dep kútilýde.
