DAISH terorıstik toby turǵyndarǵa qatysty qandaı qatigez áreketterdi qoldanatyny belgisiz. Sırıada reportaj jasaý óte qaýipti. Sondyqtan jýrnalıser DAISH basyp alǵan jerlerge kóp bara bermeıdi. Alaıda óz ómirin qaterge tigip Sırıadaǵy jaǵdaı týraly aqparatty jýrnalıserge jetkizip otyrǵan turǵyndar bar. Bı-bı-sı korespondenti sońǵy úsh aıda Rakka turǵynymen habarlasyp turdy. Ol kúndelik jazady. Onda DAISH sodyrlary basyp alǵan qaladaǵy turǵyndardyń jaǵdaıy baıandalady.
Buǵan deıin kýáger kúndeliginiń 1-shi, 2-shi bólimin jarıaladyq.
Kýáger kúndeligi (3-shi bólim):
Revolúsıadan keıin úmit oty qaıta janǵan edi. Men shetelge ketip, beıbit elde ómir súremin dep armandadym. Biraq bul arman arman kúıinde qaldy.
Qazir tańǵy ýaqyt. Men bólmemde otyryp bombanyń jarylǵanyn, kórshi balalardyń jylaǵanyn estip jatyrmyn. Bul aınalada bolyp jatqan ashshy shyndyq. Sondyqtan men armandaýdy qoıyp, tiri qalýdyń barlyq amaldaryn jasaýym qajet ekenin túsindim.
Aǵam ekeýimiz ne bolyp jatqanyn bilý úshin dalaǵa shyqtyq. Kórshimiz balasyn izdep júr eken. Ótken ketken adamdardan balasyn suraıdy. Ol nan alýǵa shyqqan eken.
Adamdardyń aıtýynsha, bomba Abdýl Muhammedtiń úıine túsken. Barlyǵymyz sol jaqqa qaraı júgirip bardyq. Qarasaq adamdardyń dene músheleri ár jerde jatty. Kóz jumǵandardyń biri júkti edi. Kórshilerdiń aıtýynsha, áıel birneshe kúnnen keıin bosaný kerek edi.
Ushaqtar ushyp ketkennen keıin, ózim jumys isteıtin dúkenge keldim. Bastyǵym kúlimsirep shaı iship otyr eken. Biraq osy joly temeki shekpedi. Sebebi ol ádette shaıdy temeki shegip otyryp ishetin. DAISH sodyrlary temeki tartýǵa tyıym salǵan. Olar bastyǵymnan temekiniń ıisin sezip, kópshiliktiń kózinshe ony qorlaǵan. Odan keıin qylmysker sekildi uryp tastaǵan. Biz sóılesip otyrǵanda dúkenge qaǵaz ustaǵan birneshe adam kirdi. Olar bizge qaǵazdy berdi de eshteńe aıtpastan shyǵyp ketti. Qaǵazda DAISH-tyń dúkenderde teledıdar qoıýǵa tyıym salynǵany jazylǵan eken. Teledıdardy alyp tastaýǵa bir apta berdi. Syrtqy álemnen qol úzgenimiz azdaı ony kógildir ekran arqyly da qaraı almaıtyn boldyq.
Biraz ýaqyttan keıin dúkenge dosym keldi. Ony DAISH adamdary tutqyndaǵannan keıin birneshe aı boıy kórmegen edik. Bul onyń tórtinshi ret qamaýǵa alynýy edi. «Bekem bol. Biz seni DAISH sodyrlary óltirip tastady dep oıladyq» dedim men.
Anam telefon shalyp, úıge kelerde azyq-túlik satyp alý kerektigin aıtty. Alaıda meniń aqsham az edi. Jolda tamaqty nelikten az satyp alǵanym týraly túrli syltaýlardy oılap bardym. Biraq anam meniń aman-esen úıge jetkenimniń ózine rıza boldy.
