Etnomádenı ortalyqtar janynan ashylǵan tegin til úıretý kýrstary óz jumysyn bastady. Aýqymdy sharany qolǵa almas buryn sala mamandary 14 sáýirde Almaty qalasynda bas qosyp, jeksenbilik mektepterde qazaq jáne ana tilderin oqytý kýrstarynyń oqytýshylaryna arnalǵan nusqaýlyq-ádistemelik semınar ótkizdi.
Jıyn barysynda qazaq jáne ana tilderin oqytý kýrstaryn júıeli ótkizý joldary talqylanyp, nátıjeli jumystyń jospary jasaldy. «Memlekettik tildi úıretý elıtalyq kýrsy» mádenı mekemesiniń dırektory, moderator Sáýle Qaıyrǵalıqyzy jıyndy ashyp, jınalǵandardy semınar baǵdarlamasymen tanystyrdy. Negizgi bólim Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy «Ákimshilik-uıymdastyrý» bóliminiń basshysy Gúlnar Seıilhanqyzynyń quttyqtaýymen jalǵasty. Til mamandarynyń talqysynda fılologıa ǵylymdarynyń kandıdaty, dosent Sáýle Asanbaıqyzy «Qazirgi bilim berý júıesinde kóptildi polımádenıetti tulǵany qalyptastyrý» taqyrybyndaǵy baıandamasyn oqydy.«Etnomádenı ortalyqtar janyndaǵy jeksenbilik mektepterde qazaq jáne ana tilderin oqytýda ınterbelsendi ádisterdi qoldaný» taqyrybynda Aınur Jálelqyzy óz oıyn ortaǵa saldy. Oqytý kýrsy boıynsha barlyq ana tilderi men qazaq tiline kúntizbelik-taqyryptyq josparlar 60 akademıalyq saǵat júktemesine negizdelip jasalý kerektigin eskertip, oqytýshylardy jalpy jumys kestesiniń eseptik tabelimen tanystyrdy.
Semınar sońy ashyq pikirtalasqa ulasty. Mamandar belgilengen mejede memlekettik til men etnos tilderin oqytýdyń ońtaıly ádisin oılasty. Biraýyzdan deńgeıli kýrstar ashýdy maquldap, bastaýysh jáne jalǵastyrýshy toptar kúntizbelik-taqyryptyq josparlar boıynsha kestege sáıkes sabaq alatyn bolady.
Aıta keteıik, aǵymdaǵy jyldyń 19 sáýirinde pedagogıkalyq keńes ótedi.
