Astanadaǵy OKQ-da baspasóz máslıhatyn ótkizgen Almaty qalasynyń ákimi Baýyrjan Baıbek bıyl qalada 14500 páter paıdalanýǵa beriletinin málim etti.

«Memlekettik baǵdarlamalar shahardyń ekonomıkasyna óte zor áserin tıgizip jatyr. Osylaısha, qaladaǵy qurylys jumystarynyń qarqyny 4 esege artty. «Nurly jer» baǵdarlamasy boıynsha 1800 úı salyndy. «Nurly jol» baǵdarlamasy boıynsha ǵana bıyl 4,5 myń úı paıdalanýǵa beriledi. Jalpy qoldanysqa beriletin úılerdiń 60 paıyzy jańadan salynyp jatqan aýdandarda boı kóteredi», - deıdi Baýyrjan Baıbek.

Almaty ákiminiń aıtýyna qaraǵanda, shaharda jeke qurylysqa basymdyq berilgen. Osylaısha, sońǵy 2 jylda 1 trıllıon teńgeniń 82 jobasy qolǵa alynǵan.

«Jeke ınvestısıa negizinde 7 myń oryndyq 54 balabaqsha salý sheshildi. Investorlardyń arqasynda búdjettegi 14 mlrd teńgeni únemdep qaldyq. Demek, jobasymen kelgen ınvestorǵa biz: «Sen eger úı salǵyń kelse, úımen birge balabaqsha men mektepti de sal» dep qolqa salamyz. Búgingi tańda úı satyp alǵysy kelgen adamdar sol mańdaǵy mektep pen balabaqshanyń, jaıly aýlanyń jaıyn oılaıdy. Sondyqtan, biz ár adam kóliksiz dúkenge baryp, balabaqshaǵa balasyn apara alatyndaı jaǵdaı jasaý jaǵynda jumys atqaramyz. Taǵy da qaıtalap aıtamyn, 7 myń balabaqshany jeke bıznes ashady. Onyń 3 myńy memleketke birden beriledi», - deıdi ákim.

Baýyrjan Baıbek, sonymen birge, shaharda kezekte turǵan árbir úshinshi otbasy bıyl úıge ıe bolatynyn málimdedi.

«2017 jyly 5880 páter paıdalanýǵa beriledi. Bul 2016 jylmen salystyrǵanda úsh ese oń kórsetkish. Demek, kezekte turǵan ár úshinshi almatylyq páterge qol jetkizedi. Jalpy, barlyq kózder boıynsha (memlekettik baǵdarlamalar, jeke ınvestısıalar - avt) bıyl biz 14,5 myń páterdi tapsyramyz», - deıdi ol.