Almatydaǵy Ǵylym ordasynda QR Ulttyq ınjenerlik akademıasy 2016-2017 jyldary atqarǵan jumys qorytyndysyn jasap, «Jyldyń úzdik ınjeneri» baıqaýynyń jeńimpazdaryn jarıalady.

Búgin Almatyda Ulttyq ınjenerlik akademıasynyń jalpy sesıasy ótip, 2016-2017 jyldary atqarylǵan jumystardyń qorytyndysy shyǵaryldy. Sondaı-aq, sesıa otyrysynda ınjener mamandyǵyn nasıhattaý, mamandyq ıeleriniń kásibı sheberligin arttyrý maqsatynda uıymdastyrylǵan «2017 jyldyń úzdik ınjeneri» baıqaýy qorytyndylandy. Jıynda baıandama jasaǵan QR Ulttyq ınjenerlik akademıasy prezıdenti Baqytjan Jumaǵulov Astanada ótken «EXPO-2017» halyqaralyq kórmeniń mańyzdylyǵyna toqtaldy.

«EKSPO-2017 kórmesi álemdik energıa júıesiniń damýyna, ári jahandyq energetıkanyń turaqty damýyna aıryqsha serpin berdi. Elimizde  shaǵyn jáne orta bıznestegi 1400-den astam kásiporyn quny 640 mıllıard teńge bolatyn taýarlardy jetkizýge jáne qyzmet kórsetýge tapsyrys aldy. Týrısik sektor jandandy.Týroperatorlardyń qyzmetine degen suranys 2 ese artty», - dedi ol.

Baqytjan Jumaǵulov baıandamasynda ǵylymı izdenisterdiń tabys tabýyn qamtamasyz etetin ınjenerlik tehnologıalar ofısin qurý qajettigin aıtty.

«Qazirgi ýaqyttta Qazaqstanda ǵylymı izdenisterdi komersıalaý jumystary uıymdastyrylyp jatyr, oǵan laıyq zańnamalyq baza da qabyldandy. Sondyqtan Ulttyq ınjenerlik akademıa osy jumysqa belsendi aralasyp, óz qurylymynan ınjenerlik tehnologıa ofısin ashý qajet»,- dedi B. Jumaǵulov.

Baqytjan Jumaǵulov baıandamasynda ónertapqyshtarǵa qoldaý kórsetý kerek ekenin basa nazar aýdardy.

«Bizdiń akademıanyń basty baǵyttarynyń biri ónertapqyshtarǵa qoldaý kórsetý bolýy kerek. Sondyqtan, biz «Jyldyń úzdik ınjeneri» baıqaýyn uıymdastyrdyq. Bizde ónertapqyshtardyń jumysyna qoldaý joq. Osy olqylyqtyń ornyn toltyryp, qyzyqty forýmdar ótkizý, bıznes qaýymdastyqpen qarym-qatynas ornatý  máselesin qarastyrýdamyz»,- dedi ǵalym. Sonymen, akademıa ótkizgen «Jyldyń úzdik ınjeneri» baıqaý qorytyndysy boıynsha, «First International Oil Corparation LTD» munaı kompanıasynyń vıse-prezıdenti Nysanbaı Qýantaev, QR Energetıka mınıstrligi Iadrolyq fızıka ınstıtýty Qatty deneler fızıkalyq zerthanasynyń meńgerýshisi Artem Kozlovskıı, «Gıdroprıbor» ǴZI» AQ-nyń bas konstrýktory Aleksandr Adylın, «Geomark» ǵylymı ınjenerlik ortalyǵy» JSHS bas ınjeneri Sergeı Asaınov, «Ǵalam» JSHS-niń bólim basshysy Arman Bekembaev, «Ýnıversal» kompanıalar tobynyń dırektorlar keńesiniń tóraǵasy Zakirjan Kýzıev, «Alataı jaryq kompanıasy» AQ dırektory Altaı Ábdirahmanov, «KazFosfat» JSHS-niń Jambyl oblysy boıynsha fılal basshysy Leonıd Frangýlıdı, M.Áýezov atyndaǵy Ońtústik Qazaqstan memlekettik ýnıversıtetiniń rektory Jumahan Myrhalyqov, «Qarajambasmunaı» AQ-nyń burǵylaý boıynsha geology Aıdyn Qojash «Jyldyń úzdik ınjeneri» atandy.

Sondaı-aq, búgingi sesıa jınalysynda birqatar mamanǵa «Qurmetti ınjener» dıplomy tabys etildi. Qurmetke laıyq bolǵan «Kazfosfat» basqarma basshysy Maqsutbek Esenov jas maman daıyndaý máselesinde nátıjeli jumystar júrgizilip jatqanyn aıtty.    

«Búgingi marapatty meniń eńbegim men «KazFosfat» ujymynyń eńbegin baǵalaý dep bilemin. Bizdiń kompanıa hımıa salasynda Qazaqstandaǵy aldyńǵy qatarly kompanıalardyń biri. Sonymen qatar, biz ınjener mamandardy daıyndaýǵa da óz úlesimizdi qosyp kelemiz. Elimizdegi tehnıkalyq joǵarǵy oqý oryndarynda oqıtyn stýdentter bizde tájirıbeden ótedi. Mysaly, sońǵy eki jylda 4 myń stýdent bizden taǵylymdamadan ótip, óndiriske aralasty», - dedi «Kazfosfat» basqarma basshysy Maqsutbek Esenov.