Buǵan deıin kýáger kúndeliginiń 1-shi, 2-shi, 3-shi bólimin jarıaladyq.

Kýáger kúndeligi (4-shi bólim):

Men sharıǵat sabaǵy aıaqtaldy dep oıladym, biraq meshitke keshki sabaqqa barýymyz kerek eken. Basqa dúken ıeleri de sabaqqa qatysýy qajet. Sondyqtan keshkisin dúkenderdiń barlyǵy jabyq turatyn.

Dosym sol kúni sabaqqa kelmedi. Ol aýyryp qalǵanyn aıtty. Keıinirek onyń úıine DAISH adamdary kelgenin estidik. Alaıda ol úıinde bolmaǵan.

Bir aptalyq kýrs aıaqtaldy. Biz jańa rýhanı bilim aldyq. Kelesi kúni men kóshede bolashaǵyma qatysty tolyq senimmen kele jatqanmyn. DAISH adamy meni toqtatyp «tań namazyn oqydyń ba?» dep surady. «Iá, árıne» dep jaýap berdim. Biraq ol meniń sózime senbegen sıaqty. Meni kóshede ketip bara jatqan áıel qutqaryp qaldy. Ol kózin durys jappapty. Muny kórgen DAISH-tyq onyń artynan júgirip ketti. Men dúkenge kettim. Onda meni eki beıtanys adam izdegenin aıtty. Men qorqyp kettim. Tipti qolym qaltyrap ketti.

«Olar kimder eken?» dep suradym. «Bilmeımin, bireýiniń qolynda avtomat boldy» dep jaýap berdi.

Meni DAISH áskeriniń qataryna soǵysýǵa jibere me dep qoryqtym. Qashyp ketsem be eken dep te oıladym. Alaıda olardyń meni ońaı taýyp alatynyn bildim. Kúni boıy meni izdep kelgen eki adam týraly oı men ne bolýy múmkin degen saýal mazalady. Biraq eshkim izdep kelmedi. Men dúkendi japtym da úıge qaıttym.

«Ne boldy, balam. Óńiń bozaryp ketipti ǵoı» dedi anam. Analar balasynyń kóńil kúıin jaqsy sezedi. Tamaq ishkim kelmedi. Meni DAISH adamdary izdep kelse anamnyń jaǵdaıy ne bolmaq dep oılanyp otyrdym. Anam meniń áldenege alańdap otyrǵanymdy baıqap, ne bolǵanyn suraýmen boldy, biraq men onyń ýaıymdaǵanyn qalamadym. Sondyqtan eshteńe aıtpadym. Men túni boıy uıyqtamadym. Anam da kóz ilmegen bolar.

Tań erteń erte úıden shyǵyp kettim. Meni anamnyń kózinshe alyp ketkennen dúkennen alyp ketkeni jaqsy. Dúkenge uzyn boıly qarýy bar adam kirip keldi. Meniń artymnan kelgenine senimdi boldym. Ol adam dosymnyń úlken qıyndyqqa tap bolǵanyn aıtty. Sharıǵat sabaqtaryn ótkizgeni úshin ony ólim jazasyna kesken. Baqytqa oraı, dúkenge kelgen adam oǵan eskertip úlgeripti. Dosym qashyp ketti.

Búgin óte qıyn kún boldy. Keshkisin men dosym Muhametpen kezdestim. Ol meniń ákemmen jasty. Men odan qazirgi qorqynyshty jaǵdaıdy qalaı ózgertýge bolatynyn suradym.

Ol maǵan bolyp jatqan oqıǵalarǵa mán bermeýge keńes berdi. «Ózińdi eki taýdyń arasynda arqanmen ótip bara jatyrmyn dep elestet. Tómende bolyp jatqan jaǵdaıdyń barlyǵy — qazirgi shynaıy ómir. Al seniń maqsatyń ekinshi taýǵa aman-esen jetý. Tek sol maqsatyń týraly oılan. Tómenge qarama» dedi dosym. Endi men onyń keńesine júginemin. Tike júrip taýǵa jetýge tyrysamyn.