Jylda jeltoqsan jaqyndaǵanda táýelsiz kúni men jańa jylǵa daıyndyq jumystary sóz bolady. Barsha qazaq úshin asa qadirli Táýelsizdik merekesi ótpeı turyp, jańa jylǵa daıyndyqty bastaý eldigimizge syn. Atalmysh másele talaı márte kóterildi, aıtyldy, halyq óz narazylyǵyn bildirdi, bildirip te jatyr. Alaıda odan eshqandaı nátıje joq. Tarıhı máni zor táýelsizdik kúni jańa jyldyń tasasynda qalyp otyr.

Qamshy.kz aqparat agenttigi elimizdiń basty qalalary Astana men Almatyda Táýelsizdik kúninen daıyndyq qalaı júrip jatqanyn jazǵan. Táýelsizdik kúnine qatysty jospar men jańa jylǵa daıyndyq qashan bastalatynyn bilý maqsatynda Almaty ákimdigine arnaıy saýal da joldadyq.

Onda jańa jylǵa daıyndyq Táýelsizdik kúninen keıin biraq bastalady dep tasqa tańba basqandaı jazylǵan. Alaıda qalada jańa jylǵa daıyndyq qazirden bastalyp ketti. Oǵan «Dostyq Plaza», «Esentai mall», «Mega Park» syndy saýda ortalyqtaryndaǵy jańa jyldyq bezendirýler men ornatylǵan shyrsha dálel.

Qala boıynsha halyq kóp júretin jerlerdiń biri – Saıahatta jańa jyldyq shyrsha qasqaıyp turǵany da biraz ýaqyt boldy. Sonda Almaty ákimdiginiń daıyndyqty Táýelsizdik kúninen keıin bastaımyz degen sózi qaıda?! Almaty ákimdigi eki sóıleıtin bolǵany ma?

Qalada ákimdiktiń ruqsatynsyz mundaıǵa jol berilmeıtini anyq Onyń ústine ákimdikter arnaıy kásip ıelerine jańa jylǵa daıyndyqty bastaý qajettigin eskertetinin, óıtpegen jaǵdaıda aıyppul salynatynyn eskertetinin astanalyq kásipker aıtqan edi.

Qoǵamdyq belsendi, ekonomıs Muhtar Taıjan áleýmettik jelide Astanada jańa jyldyq bezendirýdi toqtatýdy, onyń ornyna kósheler men kópshilik oryndar ulttyq naqyshta, Qazaqstan Respýblıkasynyń Memlekettik týynyń túsimen bezendirilýin talap etti. Bul talapqa qosylatyndar óz aty-jónderi men turatyn qalasyn jazyp qaldyrdy. Sonyń nátıjesinde júzdegen adamnyń qoly jınaldy.

Muhtar Taıjan keshe QR Prezıdenti ákimshiligine júzdegen adamnyń talabyn ótkizdi.  

Halyqtyń talaby oryndalady dep senemiz. Sebebi ulttyq qundylyǵymyzdy aıqyndamaı, el, ult úshin mańyzdy qajetsiz dúnıeniń ara jigin ajyrata almasaq tarıhı tamyrymyzdan ajyraımyz. Eldigimizge syn.

Ásem Álmuhanbet