Almaty ákimi Baýyrjan Baıbek qalanyń aryq jelilerin salý jáne qaıta jasaýdyń barysyn tekserdi, sonymen qatar Úlken Almaty ózeni jaǵalaýynyń, Medeý jáne basqa da taý bókterleriniń yldıly ýchaskelerin nyǵaıtý jumystarymen tanysty.
Almaty ákimi jumys sapary barysynda GES1-BAO avtojolyndaǵy qaýipti aımaqtaǵy salynyp jatqan qorǵanys nysanynyń qurylysymen jáne yldıly ýchaskelerdi nyǵaıtý jumystarynyń barysymen tanysty.
Ýchaskede birqatar jer ústi jumystary aıaqtalǵan, gabıondy konstrýksıalar men tirek qabyrǵasy ornatylǵan.Bókterli jerlerdi ınjenerlik qorǵaý barysynda ankerlerge gabıondy torlar qoıylǵan. Gabıonnan jasalǵan konstrýksıalar ıntensıvti sý jáne jel erozıasy kezinde óziniń bastapqy qalpyn esh ózgertpeıdi. Gabıondar uzaq merzimdi, nysan topyraqpan toltyrylady, taptalady, sodan keıin landshaftyń tabıǵı elementine aınalady. Búgingi kúni qurylys merdigeri «Saffat Building Group» JSHS jumystyń 98%-yn atqarǵan, obektini iske qosý 20 qarashaǵa josparlanǵan. Keler jyldyń kókteminen bastap ýchaskeni jasyldandyrý jumystary qolǵa alynady. Qarashanyń sońyna deıin Medeý men Shymbulaqqa baratyn joldyń taý bóketerleri nyǵaıtylatyn bolady.
Jumys sapary barysynda Baýyrjan Baıbek «Baǵanashyl» yqsham aýdanyndaǵy jumysty da tekserdi. Jobalaýshylar topyraqtyń quramy men seısmıkalyq jaǵdaıyn eskere otyryp, tirek qabyraǵsyn jasaǵan. Qaýipti ýchaskeniń jalpy uzyndyǵy 200 metr. Qazirgi kezde munda barlyq jumystyń 70%-y oryndalǵan, saıly jerlerdi kesý jáne topyraqty syrtqa shyǵarý jumystary júrýde.
«Tehnologıalyq kúrdeli joba. Ýchaskede 40 maman, 20-dan astam tehnıka birligi jumys isteýde. Jumys eki kezeńde, ıaǵnı táýlik boıyna júrýde. Negizgi jumystardyń barlyǵy qarashanyń sońynda bitedi», - dedi merdigerlik uıymnyń dırektory Valerıı Solomkoı.
Almaty ákimine «Kishi Almaty» ózeni arnasynyń boıyndaǵy Taırov kóshesiniń uzyndyǵy 470 metr bolatyn yldıly jeriniń gabıondy tormen nyǵaıtylǵany aıtyldy.
«Turǵyndardan qaýipti aımaq týraly 2013 jyldan beri shaǵym túsip kelgen edi. Yldıly ýchaskede 150 úı bar. Qazir nyǵaıtý jumystary tolyq bitti, 2-3 kúnniń ishinde abattandyrý jumystaryn da aıaqtaımyz», -dedi «Arys LTD» JSHS merdigerlik uıymynyń bas dırektory Qýat Tajmaǵambetov.
