Almatyda BUU damý baǵdarlamasyndaǵy «Turaqty kólik» jobasynyń 6 jylda kórsetken nátıjeleri jarıalandy.
Jıyn barysynda Almaty ákimi Baýyrjan Baıbek Turaqty kólik jobasy aıasynda atqarylǵan jumystar týraly aıtyp berdi.
«Maǵan ókpeleıtinder kóp. Nege velosıpedshilerdiń az ekenin bile tura, sonsha velojol saldyńyzdar deıdi. Men aıtar edim. Aldymen jaǵdaı jasaý kerek. Eger velosıpedpen júrý qaýipsiz bolmasa eshkim otyrmaıdy. Almaty ákimdigi alǵan baǵytynan qaıtpaıdy. Óıtkeni bul nátıjesin kórsetip jatqan joba»- dedi ákim.
Qala basshysy aqyly turaqtarǵa qatysty narazylyqtan da habardar ekenin aıtty.
«Adamdar aqyly turaqtar ne úshin dep aıtady. Erteńgi kúni týra osy adamdar ekologıa týraly dabyl qaǵa bastaıdy. Jaıaý júrginshi joldary, velojoldar aqyly turaqtar barlyǵy qalanyń ekologıalyq ahýalyn jeńildetýge baǵyttalǵan», - dedi B.Baıbek.
Onyń aıtýynsha qala ákimdigi Turaqty kólik jobasyn ary qaraı jalǵastyratyn bolady.
Ákim 6 jylda jetken tıimdi jetistikter týraly da tilge tıek etti.
«Almatyda birneshe jylda 10 asa jol aıyryǵy salyndy. Oǵan 3 mlrd teńge jumsaldy. BAKAD joly 40-60 myń kólikti azaıtady. 1-JES gazǵa kóshti. Kelesi jyly «Samuryq Energo» AQ 7 mlrd teńge salady. Osynyń arqasynda aýaǵa taraıtyn zıandy zattardy 9 paıyzǵa azaıtýǵa bolady. BUU Damý baǵdarlamasynyń usynysymen jolaýshylar tasymaly naryǵyn kóleńkeli ekonomıkadan shyǵardyq. 20 tasymaldaýshy múlde tabys joq dep shaǵym aıtatyn. «Ońaı» arqyly naryq kólemi 21 mlrd teńge ekenin anyqtadyq. Búdjetke ashyq bıznesten taza salyq túse bastady. Al kásiporyndardyń ózderi avtobýs satyp alýda»,- dedi ákim.
BUU Damý baǵdarlamasynyń Qazaqstandaǵy turaqty ókiliniń orynbasary Mýnhtýıa Altangerel Almatynyń kólik salasyndaǵy ózgeristerdiń ekologıaǵa yqpaly qandaı bolatynyn aıtty.
«Eger Almatyda Turaqty kólik jobasy osylaı jalǵasa beretin bolsa atmosferaǵa tikeleı zıandy zattar 500 mln tonnaǵa, janama zıandy zattar 1 mln tonnaǵa qysqarady»,- dedi Mýnhtýıa Altangerel.
Onyń aıtýynsha, qazir Turaqty kólik jobasy jaıly Shymkent pen Temirtaý qalalary qyzyǵýshylyq bildirip otyr.
Aıta ketý kerek, Turaqty kólik jobasyn Almaty ákimdigi 2011 jyldan beri júzege asyryp keledi.
Negizgi maqsat qaladaǵy kólikterdiń aýaǵa zıandy zat bólýin shekteý arqyly ekologıalyq ahýalyn jaqsartý bolyp tabylady.
Almaty turaqty kólik jobasy aıasynda qoǵamdyq kólik salasyna qatysty zań jobasy ózgerip BRT jáne LRT jobalary jasaldy, 10 shaqyrymdaı velojol jasaldy. Avtobýstardyń 44 paıyzy gazǵa kóshti.
